ក្រុងបាងកកៈ ក្រុមហ៊ុនប្រតិបត្តិការហាងកាហ្វេ Starbucks Corp បានកំណត់ចក្ខុវិស័យខ្លួនលើការពង្រីកប្រតិបត្តិការនៅក្នុងប្រទេស ដែលនិយមពិសាតែមួយចំនួន ដូចជាប្រទេសឥណ្ឌា និងចិនជាដើម ដែលក្នុងប្រទេសទាំងនោះការបរិភោគកាហ្វេនៅមានបរិមាណទាបតែមាន សក្ដានុពលកំណើនលក់ខ្លាំង។
ក្រុមហ៊ុន Starbucks គ្រោងនឹងបង្កើនចំនួនហាងលក់កាហ្វេ Starbucks នៅប្រទេសចិនរហូតដល់១ ៥០០កន្លែងនៅត្រឹមឆ្នាំ២០១៥ ដោយកើនឡើងពីចំនួន ៨៥០កន្លែងនៅក្នុងទីក្រុងចំនួន ៧០ នាពេលបច្ចុប្បន្ន។ រហូតមកដល់ពេលនេះ Starbucks បានចូលវិនិយោគក្នុងប្រទេសចិនអស់រយៈពេល១៣ឆ្នាំ។
ក្រុមហ៊ុន Starbucks ក៏មានបំណងបើកសាខាបន្ថែមទៀតនៅប្រទេសឥណ្ឌាផងដែរ ដែលបច្ចុប្បន្ននេះ ក្រុមហ៊ុននេះមានហាងលក់កាហ្វេតែ១២កន្លែងប៉ុណ្ណោះ។
ក្រុមហ៊ុនលក់កាហ្វេអាមេរិកមួយក៏គ្រោងនឹងបើកសាខាដំបូងខ្លួននៅប្រទេសមីយ៉ាន់ម៉ាក្នុងរយៈពេលពីរឆ្នាំខាងមុខទៀតដែរ។
នៅក្នុងដំណើរទស្សនកិច្ចទៅកាន់ទីក្រុងបាងកក ប្រទេសថៃដើម្បីប្រារព្ធរំឭកខួបលើកទី១៥ ឆ្នាំនៃការវិនិយោគនៅទីនោះ អគ្គនាយកក្រុមហ៊ុន Starbucks លោក Howard Schultz បានថ្លែងថា ខណៈហាងកាហ្វេStarbucks បានបន្តកំណើននៅអាស៊ីអាគ្នេយ៍នោះ ប្រទេសថៃនឹងដើរតួនាទីសំខាន់មួយនៅក្នុងការអភិវឌ្ឍ និងការពង្រីកខ្លួនរបស់ក្រុមហ៊ុន Starbucks។
ក្រុមហ៊ុននេះគ្រោងនឹងពង្រីកសាខាឲ្យបានទ្វេដងនៅក្នុងព្រះ រាជាណាចក្រថៃឲ្យដល់ចំនួន ៣២០សាខានៅក្នុងរយៈពេល៥ឆ្នាំខាងមុខ។
ហាងកាហ្វេសហគមន៍ទីបួននៅទូទាំងពិភពលោករបស់ក្រុមហ៊ុន Starbucks ត្រូវបានបើកសម្ពោធជាផ្លូវការនៅប្រទេសថៃពីថ្ងៃម្សិលមិញដែលហាង សហគមន៍បីផ្សេងទៀតមាននៅក្នុងទីក្រុង Los Angeles ក្រុងញូវយ៉កនិងរដ្ឋ Texas។
ហាងសហគមន៍នៅអាស៊ីទីមួយនេះមានទីតាំងនៅជិតផ្សារសហគមន៍ Portico នៅក្នុងតំបន់ផ្លូវឡាងសួនក្រុងបាងកក។ ហាងកាហ្វេ Starbucks នឹងបរិច្ចាគប្រាក់១០បាតពីគ្រប់មុខភេសជ្ជៈដែលលក់នៅទីនោះដើម្បី ជួយដល់ការបង្កបង្កើនផលរបស់ប្រជាសហគមន៍នៅខេត្តភាគខាងជើងរបស់ ប្រទេសថៃ។
លោក Schultz បានថ្លែងថា៖ «ខ្ញុំត្រូវនិយាយថា ខ្ញុំមានមោទនភាពណាស់ចំពោះអត្ថន័យរបស់ហាងសហគមន៍នេះ។ វាពិតជាការចែករំលែកតម្លៃនៃអ្វីដែលហាងកាហ្វេ Starbucks បានធ្វើនៅជុំវិញពិភពលោក»។
ក្រមហ៊ុន Starbucks មានហាងកាហ្វេចំនួន១៩ ០០០នៅក្នុងប្រទេសចំនួន៦២ជុំវិញពិភពលោក។
លោក Schultz បានមានប្រសាសន៍ថា៖ «យើងមិនដែលសុបិនថា ហាង Starbucks នេះនឹងក្លាយជាហាងកាហ្វេដ៏មានប្រជាប្រិយមួយនៅទូទាំងពិភពលោកនោះ ទេ»។
អាជីវកម្មរបស់ក្រុមហ៊ុន Starbucks ទទួលបានលទ្ធផលនៅគ្រប់ប្រទេសទាំងអស់ សូម្បីតែនៅប្រទេសចិនដែលធ្លាប់និយមពិសាតែក្ដី៕ PN ប្រភពពី Postkhmer.com
Facebook
No comments:
Post a Comment