ខាងក្រោមជាមតិរបស់យុវជន៤នាក់ ដែលខ្លះថា ជាការពិត ដើម្បីទទួលបានការគាំទ្រពីអ្នកលេង Facebook ហើយ អ្នកខ្លះទៀតថា វាគ្រាន់តែជាការកម្សាន្ត កែអផ្សុកបែបថ្មីតែប៉ុណ្ណោះ។
យុវជន ធី ដារ៉ូ បុគ្គលិកក្រុមហ៊ុនឯកជនមួយ បានឲ្យដឹងថា វាជាការពិតណាស់ ព្រោះទូរសព្ទងាយស្រួល ថតភ្លាម បង្ហោះបានភ្លាម ហើយពិសេសយុវវ័យដែលមានរូបសម្ផស្សស្អាតៗ ឧស្សាហ៍ថតទុក ព្រោះចង់បង្ហាញនូវអ្វីដែលគេមាន ទៅកាន់អ្នកដទៃ។ ដារ៉ូ បានបន្ថែមថា “ឲ្យតែជួបជុំគ្នា ពួកគេលើកទូរសព្ទគ្រប់ដៃមកថត ហើយខំបញ្ចេញគ្រប់កាយវិការ ធ្វើយ៉ាងណា ឲ្យរូបចេញមកកាលីប” ។
យុវជន សាការី និស្សិតឆ្នាំទី៤ ជំនាញព័ត៌មានវិទ្យា នៅសាកលវិទ្យាល័យអាយអាយស៊ីនៃបច្ចេកវិទ្យា បានឲ្យដឹងស្រដៀងគ្នានឹងដារ៉ូដែរថា អ្នកខ្លះយល់ថា មកពីពួកគេបង្ហោះរូបទាំងនោះ តាម Facebook ទៅ ចេះតែទទួលបានការចាប់អារម្មណ៍ ដូចជា Like ឬ Comment សរសើរ ទើបចេះតែថត រហូតបែបនេះ។
សាការី បាននិយាយយ៉ាងនេះថា “មែនបង ភាគច្រើន ទៅណាក៏ខ្ញុំឃើញ ពិសេសស្រីៗថតទុករហូត បើតាមខ្ញុំដឹង គឺចង់ល្បី ចង់ឲ្យគេសរសើរ ទើបម្នាក់ៗមានអីបន្តិចក៏ថត ហើយដាក់តាមFacebook មិនចេះឆ្អែត”។
កញ្ញា ស្រីល័ក្ខ និស្សិតនៅសាកលវិទ្យាល័យ ធនធានមនុស្ស ដែលជាអ្នកចូលចិត្ត ថតរូបនោះ បានឲ្យដឹងថា កញ្ញាចូលចិត្តខ្លាំងណាស់ ព្រោះសម័យអ៊ីនធឺណិតហើយ អ្នកដែលអាចប្រើទូរសព្ទថតរូបបាននោះ ក៏មានច្រើន ដូច្នេះអ្នកណាក៏ចង់បង្ហាញពីសម្រស់របស់ខ្លួនដែរ។
កញ្ញារូបនេះបានបន្ថែមថា “ជាក់ស្ដែងខ្ញុំនិងមិត្តភ័ក្កិ ពេលទៅណាមកណា តែងតែធ្វើស្តាយ Cute Cute ប្លែកៗ ថតដាក់តាម Facebook ដើម្បីបង្កើតមិត្តភាព ពិសេសរូបដែលបានប្រើកម្មវិធី កែសម្រួលហើយ សូម្បីតែខ្ញូំខ្លួនឯងក៏ស្រឡាញ់ដែរ ដូច្នេះហើយទើបចេះតែថតលេងជាបន្តបន្ទាប់។ ខ្ញុំជឿជាក់ថា គ្រប់មនុស្សស្រីតែងតែចង់បាន ឲ្យគេសរសើរពីរូបសម្រស់របស់ខ្លួន”។
កញ្ញា ឡុង ជីជី អាយុ១៩ឆ្នាំ ដែលជាអ្នកប្រើប្រាស់ Facebook ហើយឧស្សាហ៍ថតរូបបង្ហោះដែរនោះ បានឲ្យដឹងថា ការថតរូបជាការកម្សាន្ត កែអផ្សុក និងទុកជាអនុស្សាវរីយមិនមែនចង់ល្បី ឬចង់បានការសរសើរពីអ្នកដទៃ ទើបថតរូបនោះទេ។ ជីជី បាននិយាយយ៉ាងនេះថា “ខ្ញុំចូលចិត្តថត ព្រោះថតរូបអាចជួយកែអផ្សុក អាចមើលឃើញសម្រស់ខ្លួនឯង ជំនួសការឆ្លុះកញ្ចក់ ប៉ុន្តែមិនមានបំណងចង់ល្បី ឬចង់ឲ្យអ្នកណាម្នាក់សរសើរនោះទេ”។
ចុះអ្នកវិញ ចូលចិត្តថតរូបដើម្បីអ្វីដែរ? http://news.sabay.com.kh/articles/425916
Facebook
No comments:
Post a Comment