ការផ្តល់ហិរញ្ញប្បទាននេះបានធ្វើឡើងកាលពីម្សិលមិញ ក្នុងគម្រោងកិច្ចសហប្រតិបត្តិការត្រីភាគីលើការអភិវឌ្ឍផលិតកម្ម ដំឡូងមីនៅកម្ពុជាដែលចូលរួមសហការដោយភាគីចិន កម្ពុជា និង អង្គការសហប្រជាជាតិដើម្បីការអភិវឌ្ឍ(UNDP)។
ថ្លែងនៅក្នុងពិធីចុះហត្ថលេខាកាលពីម្សិលមិញ លោកស្រី Lv Zhouxiang តំណាងក្រសួងពាណិជ្ជកម្មចិន បានឲ្យដឹងថា ដោយមើលឃើញថា កម្ពុជាមានតម្រូវការផ្នែកបច្ចេកទេសដើម្បីពង្រឹងគុណភាពផលិតផល ដំឡូងមី ដូច្នេះចិន និង UNDP ក៏សម្រេចបន្តកិច្ចសហការបន្ថែមទៀតក្នុងការផ្តល់ជំនួយថវិកា និងបច្ចេកទេសដើម្បីរួមចំណែកពង្រឹងផលិតកម្មដំឡូងមីនៅកម្ពុជា។ លោកស្រីបន្តថា៖ «កិច្ចសហការនេះមានគោលបំណងធ្វើឲ្យអ្នកផលិត[កសិករ] អ្នកកែច្នៃ និង អ្នកនាំចេញដំឡូងមីនៅកម្ពុជាអាចមានលទ្ធភាពនាំចេញផលិតផលរបស់ ខ្លួនទៅទីផ្សារបានកាន់តែច្រើន»។
លោកស្រីបានបន្តថា គម្រោងនេះនឹងរួមចំណែកដល់កិច្ចខិតខំប្រឹងប្រែងរបស់ប្រទេស កម្ពុជាក្នុងការកសាងសមត្ថភាពប្រកួតប្រជែងរបស់ខ្លួននៅលើទីផ្សារ និងការធ្វើពិពិធកម្មផលិតផលនាំចេញផងដែរ។
គម្រោងកិច្ចសហប្រតិបត្តិការនេះនឹងចាប់ផ្តើមអនុវត្តចាប់ពីពេល នេះរហូតដល់ដំណាច់ខែមីនាឆ្នាំ២០១៤។ការគាំទ្រផ្នែកហិរញ្ញវត្ថុ និងការផ្តល់ការបណ្តុះបណ្តាលផ្នែកបច្ចេកទេសនេះគឺជាដំណាក់កាលទី ពីរហើយ។ក្នុងដំណាក់កាលដំបូងចិនបានផ្តល់ថវិកាចំនួន២១ម៉ឺន ដុល្លារលើគម្រោងស្រដៀងគ្នានេះ។
ដំឡូងមី ជាដំណាំកសិកម្មធំជាងគេទីពីរនៅកម្ពុជាបន្ទាប់ពីដំណាំស្រូវហើយ វាក៏បានដើរតួនាទីយ៉ាងសំខាន់ផងដែរក្នុងការរួមចំណែកអភិវឌ្ឍ ស្ថានភាពនៃការរស់នៅរបស់ប្រជាជន។
កាលពីឆ្នាំមុនដំឡូងមីត្រូវបានដំាដុះលើផ្ទៃដីសរុប ៣៣៧ ៤៤១ ហិកតានឹងទទួលផលសរុបប្រមាណ៨លានតោន។
ចំណូលពីការលក់ដំឡូងមីមានចន្លោះពី ២០០ លានដុល្លារ ទៅ ៣០០ លានដុល្លារក្នុងមួយឆ្នាំ រួមបញ្ចូលទាំងការនាំចេញផ្លូវការនិងក្រៅផ្លូវការ។ នេះបើតាមតួលេខក្រសួងកសិកម្មរុក្ខាប្រមាញ់និងនេសាទ។ ទិន្នន័យបង្ហាញថា ក្នុងចំណោមការនាំចេញសរុបកម្ពុជាបាននាំចេញប្រហែល៩០ ភាគរយទៅប្រទេស ថៃ និង វៀតណាម ទាំងមិនទាន់កែច្នៃ។
អ្នកស្រី នង រតនា អ្នកវិភាគគម្រោងកាត់បន្ថយភាពក្រីក្រប្រចាំអង្គការ UNDP ឲ្យដឹងថាបច្ចុប្បន្នចំណិតដំឡូងមីស្ងួតរបស់កម្ពុជាមិនអាចនាំចេញ ទៅចិនបានទេដោយសារអសមត្ថភាពក្នុងការបំពេញតាមស្តង់ដារ ការគ្រប់គ្រងអនាម័យ និង ភូតគាមអនាម័យដែលមិនសមស្របតាមលក្ខខណ្ឌតម្រូវពីខាងទីផ្សារចិន។ អ្នកស្រីបន្តថា៖ «គម្រោងកិច្ចសហប្រតិបត្តិការនេះនឹងជួយបណ្តុះបណ្តាលអ្នកផលិតនិង អ្នកនាំចេញឲ្យយល់កាន់តែច្បាស់ពីលក្ខខណ្ឌតម្រូវនៅលើទីផ្សារ ប្រទេសចិន។ ដូច្នេះយើងសង្ឃឹមថា វានឹងរួមចំណែកពង្រឹងការនាំចេញដំឡូងមីពីកម្ពុជាដោយផ្ទាល់ទៅ ចិនកាន់តែច្រើនជាងនេះ»។
អ្នកស្រី សេតស៊ុគុ យ៉ាម៉ាសាគិ នាយក UNDP ប្រចាំកម្ពុជាឲ្យដឹងថា សព្វថ្ងៃនេះកម្ពុជាគឺជាប្រទេសផលិតដំឡូងមីធំជាងគេទីប្រាំពីរ ក្នុងតំបន់អាស៊ី និងត្រូវគេព្យាករថានឹងក្លាយជាអ្នកផលិតធំទីប្រាំ បន្ទាប់ពីថៃ ឥណ្ឌូនេស៊ី ឥណ្ឌា និង ចិន នៅ ២០១៨។
ទិន្នន័យនំាចេញរបស់ក្រសួងពាណិជ្ជកម្មក្នុងត្រីមាសទីមួយឆ្នាំ នេះបង្ហាញថា កម្ពុជានាំចេញដំឡូងមីស្រស់និងស្ងួតសរុប២៤,៥ ម៉ឺនតោនធ្លាក់ចុះប្រមាណ៤៧ ភាគរយបើធៀបរយៈពេលដូចគ្នាកាលពីឆ្នាំមុន ដែលមាន៤៦,៥ ម៉ឺនតោន៕ ប្រភពពី postkhmer.com
Facebook
