ជុំ លីណូ ធ្វើឲ្យ​មហាជន​ផ្ទុះ​សំណើច​ ពេល​លេងស្ទីល​ ទិន ហ្វី​

ប្រភពពី lookingtoday.com : ភ្នំពេញ៖ តារាចម្រៀងប្រុស ពូកែខាងរាំរែកតាម តារាចម្រៀង ប៉ុបពិភពលោក ម៉ៃឃើលជែកសុន លោក ជុំ លីណូ ហាក់កំពុងតែ មានកេរ្តិ៍ឈ្មោះល្បីល្បាញ ខ្លាំងឡើងៗ ខណៈបានក្លាយជា តារាសម្ដែងក្នុងខ្សែ ភាពយន្តរបស់ ផលិតកម្មសាន់ដេ ជាបន្តបន្ទាប់ ។ ក្នុងឱកាសនៃ ការបង្ហាញវត្តមាន ក្នុងថ្ងៃសន្និសីទ ស្ដីពីការ ប្រកាសបញ្ចាំង ខ្សែភាពយន្តរឿង "ព្រាយក្បាល៨" លោក ជុំ លីណូ បានតុបតែងខ្លួន យ៉ាងស្រស់សង្ហា ប្រៀបបាននឹង តារាចម្រៀងកូរ៉េ ដែលស្លៀកពាក់ យ៉ាងសមសួន ពេលមានកម្មវិធីធំៗណាមួយ។
ពេលនោះ ជុំ លីណូ បានធ្វើឲ្យទស្សនិកជន និងអ្នកគាំទ្ររបស់លោក រួមនឹងតារាចម្រៀងដទៃទៀត ភ្ញាក់ផ្អើលមិនតិចទេ ដោយសារលោក បានលេងស្ទីល ក្នុងការនិយាយស្ដី បែបបញ្ចូលសំឡេង ក្នុងខ្សែភាពយន្តចិន នាំឲ្យទស្សនិកជនជាច្រើននាក់ បង្វែការចាប់អារម្មណ៍ ទៅលើលោកជាខ្លាំង ។ ជុំ លីណូ កន្លងមកគេ ធ្លាប់ភ្ញាក់ផ្អើល ម្ដងរួចមកហើយ តាមរយៈការបង្ហាញ ក្បាច់រាំរបស់លោកតាម ស្ថានីយទូរទស្សន៍ មួយចំនួន លោករាំ បានល្អដូចស្ទើរ តែទាំងស្រុង ទៅនឹង តារាចម្រៀងល្បី របស់ពិភពលោក លោក ម៉ៃឃើលជែកសុន ។
ថ្លៃងទៅកាន់ ទស្សនិកជន ក្នុងឱកាសនោះ ជុំ លីណូ បាននិយាយថា ក្នុងខ្សែភាពយន្តនេះ លោកបានចំណាយ កំលាំងកាយចិត្តជាច្រើន ដើម្បីឲ្យខ្សែភាពយន្តនេះ បានល្អអ្វីដេលសំខាន់ លោកបានលេង ជាតួក្បាលខូច ស័ក្ដិសមទៅនឹង ចរិករបស់លោក ក្នុងភាពយន្តនេះ ។ មិនត្រឹមតែប៉ុណ្ណោះ ជុំ លីណូ ថែមទាំងនិយាយ ជាស្ទីល របស់តារាសម្ដែង បែបកំប្លែងដ៏ល្បីល្បាញ របស់ចិន លោក ទិនហ្វី នាំឲ្យទស្សនិកជន ផ្ទុះសំណើច និងនាំគ្នាទះដៃប្រាវតែម្ដង ព្រោះមើលទៅលោក និយាយ និងសម្ដែងសមខ្លាំងណាស់ ប្រៀបដូចជាតារាកំប្លែង ពិតៗតែម្ដង ។
ដោយសារ ជុំ លីណូ ហាក់មានទេពកោសល្យខ្ពស់ ពិធីករ លោក មូល សុវណ្ណគិរី បានសួរសំណួរ ទៅកាន់លោកថា ចង់ក្លាយជាតារាកំប្លែងទៀតទេ ? លោកឆ្លើយថា "អត់ទេ គ្រាន់តែជាការនិយាយ លេងសើចប៉ុណ្ណោះ ព្រោះមិនអាចឈានដល់ កំពូលដូចតារា កំប្លែងរៀមច្បងទេ..." ៕

Read more...

ផលិតកម្ម សាន់ដេ បង្ហាញមុខតារាសម្ដែង ក្នុងរឿង "ព្រាយក្បាល៨" មុនចាប់ផ្ដើមបញ្ចាំង​ (Trailer Inside)

ប្រភពពី lookingtoday.com : ភ្នំពេញ៖ នៅពេលខ្សែភាពយន្តរឿង "ព្រាយក្បាល៨" ជាវណ្ណកម្មទី៤ របស់ផលិតកម្ម សាន់ដេ ត្រៀងនឹងចាក់បញ្ចាំង នៅថ្ងៃទី៨ និងទី៩ ខែ វិច្ឆិកា ឆ្នាំ២០១៣ ខាងមុខនេះ ក្រុមតារាសម្ដែងល្បីៗទាំងប្រុស ទាំងស្រី ប្រចាំក្នុងផលិតកម្ម ក៏បានបង្ហាញវត្តមានជាសាធាណៈ ប្រាប់ពីអារម្មណ៍ និងសកម្មភាពសម្ដែងក្នុងខ្សែភាពយន្តនេះ ដែលពួកគេ បានប្រឹងប្រែងបញ្ចេញអស់នូវ ទេពកោសល្យ កំលាំងកាយចិត្តរៀងៗខ្លួន ដើម្បីជាថ្នូរមកវិញ នូវការគាំទ្រខ្លាំងពីមហាជន ទាំងក្នុង និងក្រៅប្រទេស ក៏ដូចជាជួយឲ្យខ្សែភាពយន្តខ្មែរ កាន់តែមានគុណភាពខ្ពស់។
ជាការកត់សម្គាល់ នៅក្នុងសន្និសីទបង្ហាញមុខតារាចម្រៀង ដែលបានក្លាយជាតារាសម្ដែង ក្នុងខ្សែភាពយន្តរឿង "ព្រាយក្បាល៨" ទាំងអស់នេះ គេបានសង្កេតឃើញថា ផលិតកម្មសាន់ដេ បានរៀបចំឡើង នៅមុខបរិវេណផ្សារទំនើបសុវណ្ណា ដោយមានការអញ្ជើញចូលរួម ពីសំណាក់ លោក ឡាយ សុខហុក ចាងហ្វាងផលិតកម្ម លោក ឡាយ សុខចំរើន ប្រធានគ្រប់គ្រងទូទៅ លោក ខេមរៈ ភារុណ អ្នកនិពន្ធបទភ្លេង និងចាត់ការទូទៅ ក្នុងផលិតកម្ម ព្រមទាំងតារាសម្ដែង ក្នុងរឿងនេះ ជាច្រើនដួងទៀត។
លោក ឡាយ សុខចំរើន ប្រធានគ្រប់គ្រងទូទៅ ក្នុងផលិតកម្ម បានថ្លែងថា "ថ្ងៃនេះ ក្រុមហ៊ុន សាន់ដេ ភាពយន្ដមានកិត្តិយស បានប្រារព្ធពិធីសន្និសីតសារព័ត៌មាន ស្ដីអំពីការដាក់បញ្ចាំងខ្សែ ភាពយន្ដខ្នាតធំ ដែលជាវណ្ណាកម្មទី៤របស់ខ្លួន បន្ទាប់ពីរឿង វិញ្ញាណបិសាច ជញ្ជក់ឈាម" ។
លោកបន្តថា "ក្នុងនាមផលិតកម្ម សាន់ដេ យើងខ្ញុំ មានក្ដីសង្ឃឹមយ៉ាងមុតមាំថា បងប្អូនទស្សនិកជន នឹងបានទស្សនានូវខ្សែភាពយន្ដនេះ ធានាថាល្អមើល បើបានទស្សនា ហើយនឹងចង់ទស្សនាម្ដងទៀត ។ ក្នុងនាមលោក តំណាងឲ្យផលិតកម្ម សាន់ដេ ទាំងមូល សូមថ្លែងអំណរគុណយ៉ាងជ្រាលជ្រៅ ដល់ទស្សនិកជនទាំងអស់ ដែលបានគាំទ្រ នូវបទចម្រៀងខារ៉ាអូខេ និងខ្សែភាពយន្ដរបស់ផលិតកម្ម សាន់ដេ តាំងពីដើមរហូតដល់ពេលនេះ ។ យើងខ្ញុំសង្ឃឹម និងជឿជាក់ថា ទស្សនិកជន នឹងបន្ដការគាំទ្រចំពោះស្នាដៃរបស់ផលិតកម្មយើងខ្ញុំ ទៅថ្ងៃមុខទៀតជាក់ជាមិនខាន "។
ក្រោយពីបានថ្លែងចប់ តារាសម្ដែងក្នុងខ្សែភាពយន្តនេះ ក៏បានបញ្ចេញចំណាប់អារម្មណ៍របស់ពួកគេ រៀងៗខ្លួន ដោយមាន លោក មូល សុវណ្ណគិរី និង កញ្ញា នី មុនីនាថ ជាអ្នកសម្របសម្រួល ក្នុងកម្មវិធី ហើយតារាសម្ដែងទាំងអស់ បានបញ្ជាក់ស្រដៀងៗគ្នាថា ខ្សែភាពយន្តរឿង "ព្រាយក្បាល៨" ធានាថា ពិតជាល្អមើល ពិតជាផ្ទុះសំណើចហើបគូថពីកៅអី ភ័យរន្ធត់ តក់ស្លុត ព្រោះទាំងតារាសម្ដែង ទាំងអ្នកដឹកនាំរឿង បានប្រឹងប្រែងសម្រិតសម្រាំងយ៉ាងពិសេស បំពេញអារម្មណ៍អ្នកទស្សនា មិនឲ្យខកបំណងឡើយ។
គួរបញ្ជាក់ថា ផលិតកម្ម សាន់ដេ នឹងត្រៀមចាក់បញ្ចាំងរឿងថ្មី មានចំណងជើងថា "ព្រាយក្បាល ៨" ដែលជាស្នាដៃទី ៤ របស់ខ្លួន នៅរោងមហោស្រពចេនឡា ថ្ងៃទី ៨ និងថ្ងៃទី៩ វិច្ឆិកា នៅរោងភាពយន្តលុច្យ បន្ទាប់ពីស្នាដៃទាំង ៣ កន្លងមក ទទួលបានការគាំទ្រយ៉ាងខ្លាំង ពីទស្សនិកជន។
ផលិតកម្ម សាន់ដេ បានទទួលជោគជ័យក្នុងចាក់បញ្ចាំង ខ្សែភាពយន្តជាច្រើនរឿងរួចមកហើយ ដូចជារឿង អង្គុលីមា រឿង ព្រាយដែកគោល និង រឿង វិញ្ញាណបិសាចជញ្ជក់ឈាម ជាដើម ហើយក្នុងស្នាដៃទី៤ គឺរឿង ព្រាយក្បាល៨ នេះ ក៏ជាក្ដីរំពឹងថ្មីមួយទៀត របស់ផលិតកម្ម សាន់ដេ ក៏ដូចជាមហាជន ដែលតែងតែគាំទ្រផលិតកម្មដ៏ធំមួយនេះ ខណៈតារាសម្ដែងក្នុងរឿង និងទិដ្ឋភាពទូទៅ គឺ បែបខ្មោច ព្រាយ បិសាច និងកំប្លុកកំប្លែងតាំងពីដើមរហូតដល់ចប់៕

Read more...