ព័ត៌មានដើមស្វាយ

Showing posts with label Buddha in Cambodia. Show all posts

Wednesday, June 12, 2013

បដិមាដែលអាមេរិក ប្រគល់ឲ្យខ្មែរ បាននាំមក ដល់កម្ពុជាហើយ បន្ទាប់ពីឃ្លាតឆ្ងាយ ជាង ៤០ឆ្នាំ

Posted by RothaDB at 8:14 AM 0 comments

ភ្នំពេញៈ រូបបដិមា នៃសតវត្សរ៍ទី១០ ចំនួនពីរ ដែលសារមន្ទីរមេត្រូប៉ូលីតែន (Metropolitan
Museum) នៅទីក្រុងញ៉ូវយ៉ក បានសម្រេចប្រគល់ឲ្យកម្ពុជាវិញ បានដឹកបញ្ជូនមកដល់កម្ពុជា
វិញហើយ នៅម៉ោង៦ល្ងាចថ្ងៃទី១១ ខែមិថុនា ឆ្នាំ២០១៣ បន្ទាប់ពីជនខិលខូចលួចលក់ទៅ
ក្រៅប្រទេសអស់រយៈពេលជាង ៤០ឆ្នាំ។
បើតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្រ្តីនាពេលកន្លងមក បានឲ្យដឹងថា
រូបបដិមាថ្មពីរ នៃសតវត្សរ៍ទី១០ មានឈ្មោះថា “បនទវៈ លុតជង្គង់” (Kneeling Pandawas)
ពេលខ្លះត្រូវបានគេស្គាល់ថា “ជាអ្នកបំរើ លុតជង្គង់” (Kneeling Attendants) ត្រូវបានគេលួច
ចេញពីប្រាសាទចិន នៅកោះកែរ អំឡុងពេលសង្គ្រាមស៊ីវិល ក្នុងប្រទេសកម្ពុជា នាទស្សវត្សរ៍
ទី៧០។ បដិមាទាំងពីរ ត្រូវបានសារមន្ទីរ Metropolitan នៅទីក្រុងញ៉ូវយ៉ក សម្រេចប្រគល់មក
ឲ្យកម្ពុជាវិញ ក្រោយពីមានការពិភាក្សា ជាច្រើនលើកជាមួយទីស្តីការគណរដ្ឋមន្រ្តី។
លោក Thomas P. Campbell នាយកសារមន្ទីរ Metropolitan បានថ្លែងក្នុងសេចក្តីប្រកាសព័ត៌
មាន របស់ខ្លួន កាលពីថ្ងៃទី៣ ខែឧសភា ឆ្នាំ២០១៣ ថា «សារមន្ទីរប្តេជ្ញាចិត្តអនុវត្ត យ៉ាងហ្មត់
ចត់នូវបទដ្ឋាន នៃទីកន្លែងដើម មិនគ្រាន់តែទៅលើរបស់ដែលទើបទទួលបានថ្មីៗប៉ុណ្ណោះទេ
ថែមទាំងទៅលើការសិក្សា ស្វែងយល់ពីការងារក្នុងការ ប្រមែប្រមូលសន្សំទុក របស់ខ្លួនដ៏យូរ
យារមកហើយ ក្នុងកិច្ចខិតខំប្រឹងប្រែង ដែលកំពុងតែប្រព្រឹត្តទៅ ដើម្បីសិក្សាស្វែងយល់ឲ្យ បាន
ច្រើនដែលអាចធ្វើបានទៅលើប្រវត្តិ នៃកម្មសិទ្ធិផង»។
លោក Thomas P. Campbell បានឲ្យដឹងទៀតថា សារមន្ទីរកំពុងតែពង្រឹងទំនាក់ទំនងល្អ ដែល
ខ្លួនបានរក្សាជាយូរមកហើយនោះ ជាមួយនឹងស្ថាប័នអ្នកសិក្សាស្រាវជ្រាវ និងសហសេវិកកម្ពុជា
ក៏ដូចជាការជំរុញ និងបន្តនូវទំនាក់ទំនងល្អព្រមទាំងកិច្ចពិភាក្សាល្អរវាងគ្នា និងគ្នា។
បើយោងតាមសេចក្តីប្រកាសព័ត៌មានរបស់អង្គភាពព័ត៌មាន និងប្រតិកម្មរហ័ស នៃទីស្តីការគណៈ
រដ្ឋមន្ត្រី បានបញ្ជាក់ថា រូបបដិមាថ្មពីរ ដែលមានឈ្មោះថា “បនទវៈ លុតជង្គង់” ឬ “ជាអ្នកបំរើ លុត
ជង្គង់” នេះ គឹជាផ្នែកមួយនៃរូបបដិមាមួយក្រុម ដែលតំណាងឲ្យការប្រយុទ្ធតស៊ូ ដ៏ល្បីល្បាញរវាង
ភីម (Bhima) និង ឌូរីយោដាន (Duryod hana) នៃរឿងព្រេង មហាភារតៈ (Mahabharat) ហើយ
ដែលត្រូវបានគេកាច់បំបាក់ យ៉ាងឃោរឃៅ ពីជើងទម្ររបស់វា និងបញ្ជូនចេញទៅក្រៅប្រទេស៕ ប្រភពពី Camnews.com.kh

Tuesday, April 30, 2013

ព្រះពុទ្ធរូបអង្គធំក្នុងវត្តព្រះអង្គធំកសាងរួចរាល់ ក្រសួងវប្បធម៌ត្រៀមដាក់បញ្ចូលជាបេតិកភណ្ឌជាតិ

Posted by RothaDB at 3:37 PM 0 comments

ខេត្តកំពង់ចាម ៖ ស្របពេលដែលព្រះអង្គធំមានកម្ពស់៩,១០ម៉ែត្រសាងសង់អំពីថ្ម ភក់រួចរាល់១០០ ភាគរយ រួមផ្សំនឹងសមិទ្ធផលផ្សេងៗទៀតជាច្រើនរំលេចទៅដោយក្បូរក្បាច់ រចនាដ៏ល្អគួរឲ្យចង់គយគន់ក្នុងបរិវេណវត្តមហោសថសុវណ្ណគិរី បឹងដែង ហៅវត្តព្រះអង្គធំស្ថិតនៅភូមិបឹងដែង ឃុំព្រែកកក់ ស្រុកស្ទឹងត្រង់ មានការរីកចម្រើនយ៉ាងផុលផុសនោះ ពុទ្ធបរិស័ទជិតឆ្ងាយមានការចាប់អារម្មណ៍ និងកោតសរសើរយ៉ាងខ្លាំង ។

នៅព្រឹកថ្ងៃទី២៧ មេសា សម្តេចព្រះមហាអរិយវង្ស សៅរ៍ ចន្ទថុល្ល ព្រះចៅអធិការវត្តលង្កាព្រះកុសុមារាមបានដឹកនាំព្រះសង្ឃជាច្រើន អង្គនិមន្តទៅទស្សនាដោយផ្ទាល់ ហើយបានកោតសរសើរចំពោះព្រះពុទ្ធរូបអង្គធំក្រោមការផ្តួចផ្តើម កសាងពីសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងសមិទ្ធផលផ្សេងៗទៀតក្នុងវត្តព្រះអង្គធំ ។

លោក ឃឹម សារិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ ទីប្រឹក្សាផ្ទាល់សម្ដេចតេជោ ហ៊ុន សែន មាន ប្រសាសន៍ថា ព្រះវិហារតូចនៅក្បែរជណ្ដើរចុះពីលើភ្នំបឹងដែងបានជួសជុល និងសាងសង់បន្ថែមឱ្យវែងជាងមុន និងប្រក់ដំបូល តែមិនមាន ជញ្ជាំងទេ ។ លើសពីនេះរៀបក្រាលឥដ្ឋបានស្អាតសម្រាប់លោកតា លោកយាយ និងសប្បុរសជនមកពីទីជិតឬឆ្ងាយចូលធ្វើបុណ្យទាន និងចូលសម្រាកលេងដើម្បីយក កម្លាំង ដោយសារទីនេះមាន ជំនោរខ្យល់បក់ពីទន្លេមេគង្គត្រជាក់ស្រួល ។

លោក ឃឹម សារិទ្ធ ឱ្យដឹងថា ព្រះវិហារបានកសាងឡើងនៅក្នុងអំឡុងឆ្នាំ១៨៨៥ ដោយលោកតាហៃ កែវ ។ លុះដល់របបប៉ុល ពត ព្រះវិហារនេះត្រូវគេវាយបំផ្លាញចោលអស់ ។ ក្រោយមកក្រោមការផ្ដួចផ្ដើមគំនិតពីសម្ដេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានចាត់ឱ្យលោកជំទាវ ម៉ែន សំអន ឧបនាយករដ្ឋមន្ត្រីប្រចាំការដឹកនាំកសាងសមិទ្ធផលនានា នៅក្នុងវត្តអារាមបឹងដែង ជាមួយនឹងក្រសួងវប្បធម៌ និងវិចិត្រសិល្បៈនៅក្នុងឆ្នាំ២០១១ ។

លោករដ្ឋលេខាធិការ ឱ្យដឹងថា កាលពីមុនមានតូបរបស់លោកតា លោកយាយបឹងដែងដែលជាម្ចាស់ទឹក ម្ចាស់ដីថែរក្សាភូមិឋាននេះ ប៉ុន្តែក្រោយមកគេបានសាងសង់ជាវិមានល្អស្អាតជាងមុន តាមម៉ូដបុរាណចិន ។ អាស្រមទាំងនេះគេជឿថា មានបារមីខ្លាំងពូកែដែលប្រជាពលរដ្ឋពីគ្រប់ទិសទីទៅបន់ ស្រន់ ។ ចំពោះព្រះអង្គធំមានកម្ពស់៩,១០ ម៉ែត្រសាងសង់ពីថ្មភក់សុទ្ធសាធដោយប្រើពេល២១ខែ និង១២ថ្ងៃ មានន័យថា ២១ខែគឺបញ្ជាក់ពីការសងគុណឪពុក ១២ថ្ងៃបញ្ជាក់ពីការសងគុណម្ដាយ ។ ភ្នែនព្រះអង្គឆ្វេង-ស្ដាំប្រវែង៦,១០ម៉ែត្រ និង១តឹក បូកទៅបាន៧ដែលបញ្ជាក់ពីការឧទ្ទិសបុណ្យកុសលដល់ញាតិមិត្ត ទាំង៧សន្ដាន ។ ចាប់ពីបល្ល័ង្កក្រោមមានកម្ពស់៩,១០ម៉ែត្រ បញ្ជាក់ពីមនុស្សយើងនៅក្នុងផ្ទៃ៩ ខែ១០ថ្ងៃ ។

លោក រដ្ឋលេខាធិការបន្តថា កាលពីបុណ្យចូលឆ្នាំថ្មីប្រពៃណីជាតិខ្មែរកន្លងទៅមានប្រជាជន ពីគ្រប់ទិសទីទៅលេងវត្តព្រះអង្គធំច្រើនព្រោះតែចង់ឃើញ សមិទ្ធផលទាំងនោះ ។ ជាក់ស្ដែងកាលពីថ្ងៃទី២៤ និង២៥ មេសា អ្នកដែល ទៅបុណ្យនៅវត្តដីក្រហម ឃុំសូភាស ស្រុកស្ទឹងត្រង់ បានឆ្លៀតចូលទស្សនាវត្តព្រះអង្គធំ ហើយកោតសរសើរថា នៅក្នុងប្រទេសកម្ពុជាប្រហែលជាមានតែវត្តនេះទេដែលល្អ ជាងគេ ។

លោក ឃឹម សារិទ្ធ បញ្ជាក់ថា ព្រះអង្គតូច ធំកសាងដោយថ្មភក់ និងឈើទាំងអស់ចំណាយថវិកាអស់ជាង៧០ម៉ឺនដុល្លារ ហើយពុំជំពាក់ថ្លៃជាងទេ ។ បើគិតឱ្យរួចរាល់ជាស្ថាពរនោះនឹងត្រូវចំណាយរហូតដល់ទៅ ជាង១លានដុល្លារឯណោះ ។ ក្នុងពេលខាងមុខក្រសួងវប្បធម៌នឹងបញ្ចូលវត្តព្រះអង្គធំជាបេតិ កភណ្ឌជាតិទៀតផង ។ សម្ដេចព្រះមហាអរិយវង្ស សៅរ៍ ចន្ទថុល្ល ព្រះចៅអធិការវត្តលង្កាព្រះកុសុមារាមមានថេរដីកាថា ព្រះអង្គមានក្ដីរំភើបរីករាយឥតឧបមា នៅ ពេលបាននិមន្តទៅឃើញសមិទ្ធផលប្រណីតនានាក្នុងវត្តព្រះអង្គធំ ។ សមិទ្ធផលទាំងនេះបញ្ជាក់ថា សម្ដេចតេជោ និងលោកជំទាវកិត្តិព្រឹទ្ធបណ្ឌិតពិតជាយកចិត្តទុក្ខដាក់ចំពោះ វិស័យព្រះពុទ្ធសាសនា ។

សម្ដេចព្រះមហាអរិយវង្សបានអំពាវ នាវដល់ពុទ្ធបរិស័ទ និងមន្ត្រីរាជការឱ្យចូលរួមចំណែកចូលបុណ្យដើម្បីកសាងស មិទ្ធផលនានាដែលកំពុងតែខ្វះខាតបច្ច័យដើម្បីឱ្យបានរួច រាល់ជាស្ថាពរតាមសទ្ធាជ្រះថ្លារៀងៗខ្លួន ។ នៅក្នុងឱកាសនោះសម្ដេចព្រះមហាអរិយវង្ស សៅរ៍ ចន្ទថុលបានចូលបច្ច័យចំនួន៥០០ដុល្លារ ព្រះញាណវង្ស ឃឹម សន ២០០ដុល្លារ និងព្រះសាសនមង្គល គាន សុគន្ធ ចំនួន៤០ម៉ឺនរៀល ៕

Tuesday, April 23, 2013

ព្រះពុទ្ធរូប ៦៦ អង្គ ក្នុងរូងភ្នំក្ងោកមាស រកឃើញតាមសុបិន្តក្មេងប្រុសអាយុ ១៤ឆ្នាំ

Posted by RothaDB at 9:07 AM 0 comments

ស្ទឹងត្រែង: ក្មេងប្រុសអាយុ ១៤ឆ្នាំ ត្រូវលោកសង្ឃ ពន្យល់សប្តិឱ្យទៅយកព្រះពុទ្ធរូប ក្នុងរូងភ្នំ ដើម្បីថែរក្សា។ មន្ទីរវប្បធម៌ និងវិចិត្រសិល្បះ ខេត្តស្ទឹងត្រែង មានគម្រោងបញ្ជូនព្រះពុទ្ធរូបទាំង ៦៦ អង្គនោះ ទៅទុកនៅទីក្រុងភ្នំពេញ។ ឈ្មោះ វង្ស សុខជា អាយុ ១៤ឆ្នាំ បានយល់សប្តិឃើញលោកសង្ឃ មកប្រាប់ថា មានព្រះពុទ្ធរូប នៅក្នុងរូងភ្នំក្ងោកមាស។ ក្រោយពីយល់សប្តិ នៅព្រឹកថ្ងៃទី១៨ ខែមេសា ឆ្នាំ២០១៣ ក្មេងប្រុស និងមិត្តភក្តិម្នាក់ទៀត ក៏ដើរទៅមើល ក្នុងរូងភ្នំ ហើយឃើញមានព្រះមែន។ ក្រោយមក ក្មេងប្រុស ក៏និយាយប្រាប់ឪពុកឈ្មោះ វង្ស មច្ឆា ថា រូងភ្នំ មានព្រះជាច្រើនអង្គ។ លោក វង្ស មច្ឆា ពេលឮដំណឹងកូនប្រាប់ ក៏ដើរទៅមើល។ គាត់ គឺជាអ្នកធ្វើចម្ការម្នាក់រស់នៅភូមិឆ្វាំង ឃុំសំអាង ស្រុកថាឡាបរិវ៉ាត់ ហើយបានប្រគល់ព្រះចំនួន ៦៦អង្គ និងជើងពាន ១ ទៅឱ្យលោក សំ សាឯម អតីតប្រធានមន្ទីរវប្បធម៌ និងវិចិត្រសិល្បះ ខេត្តស្ទឹងត្រែង។ លោក សំ សាឯម បានឱ្យដឹងថា ឈ្មោះ វង្ស មច្ឆា ហៅ អាត គឺជាអតីតមន្ត្រីយោធាម្នាក់ ហើយបានទៅរស់នៅភូមិឆ្វាំង ឃុំសំអាង ស្រុកថាឡាបរិវ៉ាត់ និងធ្វើចម្ការនៅទីនោះ។ ពេលគាត់រកឃើញ ព្រះពុទ្ធរូប ៦៦អង្គ និងជើងពាន ១ ក៏បានយកមកប្រគល់ឱ្យលោកនៅថ្ងៃទី១៩ខែមេសាឆ្នាំ២០១៣។ ក្រោយមកក៏បានប្រគល់ទៅឱ្យលោកប្រធានមន្ទីរថ្មីលោកផេងណាឡៃប្រធាន មន្ទីរវប្បធម៌ និងវិចិត្រសិល្បៈខេត្តបានឱ្យដឹងនៅព្រឹកថ្ងៃទី២២ខែមេសាឆ្នាំ២០១៣ ថា ព្រះពុទ្ធរូបនឹងត្រូវបញ្ជូនទៅរក្សាទុកនៅភ្នំពេញព្រោះជាសម្បត្តិ វប្បធម៌ខ្មែរ។ ព្រះពុទ្ធរូបនោះ មាន ៥៥ អង្គ ស្រោបប្រាក់ ១០ អង្គ ស្រោបមាស និង ១ អង្គ ធ្វើពីឈើ។ ក្នុងចំណោមព្រះពុទ្ធរូបទាំង ៦៦ អង្គ មាន ១៥ អង្គ បានបាក់បែកមួយចំនួន ហើយមានឈើនៅផ្នែកខាងក្នុង នៃព្រះពុទ្ធរូបនោះ។ និទានរឿងរាវរបស់ភ្នំក្ងោកមាស លោក សួន ផុត អភិបាលរងស្រុកថាឡាបរិវ៉ាត់ បានឱ្យដឹងថា ភ្នំនោះ មិនមានប្រវត្តិណាមួយគួរឱ្យបញ្ជាក់ច្រើនពេកទេ។ លោក សួន ផុន និយាយថាភ្នំនោះ មានរូបរាងដូចសត្វក្ងោក ទើបគេហៅថា ភ្នំក្ងោកមាស។ ភូមិឆ្វាំង គឺជាភូមិមួយមានចម្ងាយប្រមាណជាង ៣០ គីឡូម៉ែត្រ ពីទីរួមស្រុកថាឡាបរិវ៉ាត់។ ចម្ងាយ ៧គីឡូម៉ែត្រ ចេញពីភូមិឆ្វាំងទៀត ទើបយើងទៅដល់ភ្នំក្ងោកមាស។ ចាស់បុរាណដំណាលថា ភ្នំក្ងោកមាស មានតែលោកសង្ឃ ( លោកតាដុង ) ទេ អាចចូលទៅក្នុងរូងភ្នំនោះបាន ដើម្បីតាំងសម្មាធិអុជធូបដល់ព្រះពុទ្ធរូប។ លោក សួន ផុន បានបន្តថា មនុស្សធម្មតា គ្មានអ្នកណាគេហ៊ានចូលទៅជិតទេ។ គេជឿថា រូងភ្នំមានសត្វពស់ថែរក្សា។ តែឥឡូវបរិវេណភ្នំក្ងោកមាស ត្រូវបានគេកាប់ឆ្ការព្រៃធ្វើចម្ការអស់ហើយ ទើបមានមនុស្សហ៊ាន ចូលទៅក្នុងរូងនោះ។ ក្រៅពីភ្នំក្ងោកមាស ក៏មានភ្នំចំនួន ២ទៀត ដែលស្ថិតនៅក្បែរៗគ្នា មានឈ្មោះថា ភ្នំឈ្ងោក និងភ្នំធំ។ លោក គង់ សេនា ប្រធានប៉ុស្តិ៍រដ្ឋបាលឃុំសំអាង បានឱ្យដឹងថា ពេលដើរចូលទៅក្នុងរូងភ្នំនោះ ត្រជាក់ណាស់ ហើយងងឹតទៀតផង។ បើយើងដើរចូលទាល់តែកាន់ពិលបំភ្លឺទើបបាន។ លោកបញ្ជាក់ថា ក្នុងរូងនោះ មានថ្មខ្លះ ដូចជារបស់បុរាណ ហើយទេសភាពក៏ស្អាតដែរ។ បើសិនគេបង្កើត ទៅជាកន្លែងតំបន់ទេសចរវប្បធម៌វិញនោះ ពិតជាល្អណាស់។ តំបន់ខាងលើនេះ គេគ្រាន់តែធ្វើដំណើរតាមផ្លូវជាតិលេខ៩ ពីស្ទឹងត្រែង ខេត្តព្រះវិហារ ឆ្លងកាត់ ក៏អាចចូលទស្សនារូងភ្នំនោះបាន ព្រោះវាស្អាតល្អ ជាងទឹកហូរធ្លាក់ទៅទៀត។ ដោយសារមិនទាន់មានការអភិវឌ្ឍ ទើបគ្មានអ្នកចាប់អារម្មណ៍។ លោក ផេង ណាឡៃ បាននិយាយថា គំនិតកែច្នៃបង្កើតតំបន់វប្បធម៌ ក្នុងខេត្តស្ទឹងត្រែង ពិតជាប្រសើរណាស់ ដើម្បីទាក់ទាញភ្ញៀវទេសចរ នៅតាមកន្លែងនិមួយៗ។ ប៉ុន្តែមន្ទីរគ្មានថវិកាទើបតំបន់ទាំងនោះ ដើរទៅមុខមិនរួចបាន ត្រឹមអភិរក្សអ្វីនៅសេសសល់ពីដូនតាតែប៉ុណ្ណោះ៕ ប្រភពមកពី Cen.com.kh