ព័ត៌មានដើមស្វាយ

Showing posts with label បណ្តាញសហគមន៍ព្រៃឡង់. Show all posts

Monday, June 17, 2013

សហគមន៍នៅមណ្ឌលគិរីគ្រោងប្ដឹងរឿងកាប់ឈើខុសច្បាប់

Posted by RothaDB at 7:57 AM 0 comments

សកម្មភាពកាប់រានព្រៃឈើ យកដីអនាធិបតេយ្យនៅខេត្តមណ្ឌលគិរី កើតមានកាន់តែច្រើនតាមរយៈការប្រើប្រាស់ឈ្មោះមន្ត្រីបរិស្ថានជួល កម្មករស៊ីឈ្នួលកាប់រានព្រៃ ដើម្បីយកដីជាសម្បទានសង្គមកិច្ច។

ក្រុមសហគមន៍ជនជាតិដើមភាគតិចព្នងនៅ តំបន់នោះអះអាងថា ការកាប់រានព្រៃនេះ កំពុងបំពានទៅលើព្រៃស្រោង ព្រៃតំណម និងព្រៃកប់សពប្រពៃណីជនជាតិជាតិដើមភាគតិច។

តំណាងសហគមន៍ជនជាតិដើមព្នងនៅភូមិ ពូលុ ឃុំប៊ូស្រា ស្រុកពេជ្រាដា នៅថ្ងៃអាទិត្យ ទី១៦ ខែមិថុនា ឆ្នាំ២០១៣ អះអាងថា នឹងដាក់ពាក្យប្ដឹងតាមផ្លូវតុលាការដើម្បីចាត់វិធានការស៊ើបអង្កេត ពីសកម្មភាពកាប់ព្រៃឈើខុសច្បាប់នេះ។

ចាប់ពីខែមេសា រហូតបច្ចុប្បន្ន សហគមន៍ភូមិពូលុ ឲ្យដឹងថា ប្រជាពលរដ្ឋមានខ្មែរនិងចាមមកពីខេត្តកំពង់ចាម បានចូលទៅកាប់រានព្រៃចាប់ពីចុងភូមិពូលុ រហូតដល់តំបន់វារយោង ដើម្បីចាប់យកដីអនាធិបតេយ្យ។ ក្រុមសហគមន៍បានចុះទប់ស្កាត់ចំនួនបីលើក និងចាប់បានម៉ាស៊ីនកាត់ឈើ ៥គ្រឿង ប៉ុន្តែសកម្មភាពកាប់ព្រៃអនាធិបតេយ្យនេះនៅតែបន្តកាន់តែច្រើនឡើង។ បច្ចុប្បន្នព្រៃឈើប្រមាណជាង ១០០ហិកតារហើយត្រូវគេកាប់រាន ហើយហ៊ុមព័ទ្ធយកដីជាកម្មសិទ្ធិ។

ប្រធានសហគមន៍ភូមិពូលុ លោក ឃុត ចាន់រ៉ា មានប្រសាសន៍បញ្ជាក់ថា ក្រុមកម្មករស៊ីឈ្នួលជាច្រើនអះអាងថា បុរសម្នាក់ជាមន្ត្រីបរិស្ថានឈ្មោះ សុះ ម៉ាឡែន ជាអ្នកជួលពួកគេឲ្យកាប់ព្រៃនេះដើម្បីយកដីជាសម្បទានសង្គមកិច្ច និងមានផ្លាកតូចៗ មានសរសេរអក្សរដាក់ថា ដីលំនៅឋានប្រមាណ ២០០ផ្លាកត្រូវបានគេបោះនៅលើក្បាលដីដែលបានកាប់រាននោះ។

លោកបន្តថា មន្ត្រីអាជ្ញាធរមូលដ្ឋាន និងមន្ត្រីជំនាញបរិស្ថាន មិនបានចាត់វិធានការទប់ស្កាត់ករណីនោះទេ ហេតុនេះទើបសហគមន៍សម្រេចថា នឹងរៀបចំពាក្យប្ដឹងតាមផ្លូវតុលាការវិញ៖ «តំបន់ដែលគេកាប់ បំផ្លាញហ្នឹងច្រើនតែបងប្អូនចាម ហើយមួយចំនួនបើយើងសួរនាំទៅគេថាខ្មែរ មកពីខេត្តកំពង់ចាម មកស៊ីឈ្នួល។ យើងមើលឃើញថា នេះជាផលប្រយោជន៍សម្រាប់សហគមន៍ក៏ជាផលប្រយោជន៍សម្រាប់ពិភពលោក»។

វិទ្យុអាស៊ីសេរី នៅថ្ងៃអាទិត្យ ទី១៦ ខែមិថុនា មិនអាចស្វែងរកអាសយដ្ឋានទាក់ទងបុរសឈ្មោះ ម៉ាឡែន ដើម្បីសុំបំភ្លឺពីករណីនេះបានទេ។ ក៏ប៉ុន្តែប្រធានមន្ទីរបរិស្ថានខេត្តមណ្ឌលគិរី លោក ឈិត សុផល បដិសេធថា បុរសឈ្មោះ សុះ ម៉ាឡែន មិនមែនជាមន្ត្រីបរិស្ថាននោះទេ។

លោកបន្តថា ព្រៃតំបន់នោះមិនឋិតក្រោមការគ្រប់គ្រងរបស់មន្ទីរបរិស្ថានទៀតទេ៖ «អា ហ្នឹងការសម្រេចរបស់ខេត្តពីមុនមក ខ្ញុំមិនដឹងដែរ ព្រោះដីហ្នឹងវាលែងឋិតក្រោមការគ្រប់គ្រងរបស់បរិស្ថានហើយតែកាត់ ចេញទៅជាសម្បទានសង្គមកិច្ចទៅ មិនឋិតក្នុងតំបន់អភិរក្សទៀតទេ»។

អភិបាលរងស្រុកពេជ្រាដា លោក ខាំ ដារ៉ា មានប្រសាសន៍បញ្ជាក់ថា អ្នកដែលចូលទៅកាប់រានព្រៃនោះ គឺដឹកនាំដោយឈ្មោះ សុះ ម៉ាឡែន ជាតំណាងប្រជាពលរដ្ឋអ្នកស្នើសុំដីសម្បទានសង្គមកិច្ចនៅឃុំប៊ូស្រា។ អតីតអភិបាលខេត្តមណ្ឌលគិរី លោក ចាន់ យឿន បានចុះហត្ថលេខាឯកភាពឲ្យកាប់ឆ្ការព្រៃ សំអាតដីតាំងពីខែធ្នូ ឆ្នាំ២០១២ តាមសំណើរបស់តំណាងប្រជាពលរដ្ឋនោះ។

លោកបន្តថា អាជ្ញាធរស្រុកបានចុះទប់ស្កាត់មិនឲ្យកាប់រានតទៅទៀតទេ ពីព្រោះលិខិតអនុញ្ញាតដែលចុះហត្ថលេខាដោយអតីតអភិបាលខេត្តមិនស្រប តាមនីតិវិធីនៃការផ្ដល់ដីសម្បទានសង្គមកិច្ចឡើយ៖ «ឯកសារហ្នឹង អត់ មានឆ្លងស្រុក ឃុំ ទេ គេមិនទាន់ចែកឲ្យទេ។ ដីហ្នឹងធ្វើអនុបយោគហើយ គាត់ថា ចាប់ឆ្នោត។ មិនទាន់បានចាប់ឆ្នោតវារុករានទន្ទ្រានកាប់»។

នាយរងខុទ្ទកាល័យសាលាខេត្តមណ្ឌលគិរី លោក មឹង សុចាន់ថា មានប្រសាសន៍បញ្ជាក់ដែរថា រាជរដ្ឋាភិបាលមានគោលការណ៍កាត់ដីព្រៃនៅតំបន់ពូលុ ប្រមាណជាង ២.៤០០ហិកតារ ជាដីសម្បទានសង្គមកិច្ច ក៏ប៉ុន្តែមិនទាន់មានគោលការណ៍ចែកដីតំបន់នោះនៅឡើយ។

លោកបដិសេធថា មិនបានដឹងពីសកម្មភាពចុះកាប់ឆ្ការព្រៃយកដីមុនការបែងចែករបស់គណៈកម្មការផ្ដល់ដីសម្បទាននោះទេ៖ «យើង កំពុងរៀបចំបង្កើតក្រុមការងារ រៀបចំវាយតម្លៃផ្ដល់ឲ្យពួកគាត់ដែលគ្មានពិតប្រាកដ មានលិខិតច្បាស់លាស់។ អាហ្នឹងយើងចង់ធ្វើម៉េចឲ្យវាចំ និងដល់ដៃពលរដ្ឋពិតប្រាកដ»។

មន្ត្រីឃ្លាំមើលបញ្ហាព្រៃឈើសមាគម អាដហុក (ADHOC) ខេត្តមណ្ឌលគិរី លោក សុក រដ្ឋា មានប្រសាសន៍បញ្ជាក់ថា លោកបានចុះអង្កេតដល់កន្លែងមានទំនាស់នោះសង្កេតឃើញថា សកម្មភាពកាប់រានព្រៃបានបំពានទៅលើសិទ្ធិជនជាតិដើមភាគតិចនៅ តំបន់នោះ ដែលជាអ្នកថែរក្សាអាស្រ័យផលព្រៃឈើ និងបំពានទៅលើវប្បធម៌ប្រពៃណីជនជាតិដើមភាគតិច ពិសេសកាប់រានព្រៃគោរពបូជា និងព្រៃតំបន់កប់សពក្រុមសហគមន៍ជនជាតិដើមភាគតិច៕ ប្រភពព័ត៌មាន ៖ RFA

Wednesday, May 29, 2013

គំនរឈើហ៊ុបច្រើនសម្បើមក្នុងដីសម្បទានព្រៃឡង់

Posted by RothaDB at 8:33 AM 0 comments

កំពង់ធំៈ គំនរឈើហ៊ុបរាប់ម៉ឺនដើមត្រូវបានក្រុមហ៊ុនវៀតណាម CRCK និងក្រុមហ៊ុនរបស់លោកឧកញ៉ា ទ្រី ភាព ដែលទទួលបានដីសម្បទានសេដ្ឋកិច្ចពីរដ្ឋាភិបាល កាប់គរ នៅរាយប៉ាយពេញព្រៃ ដែលឈើមួយចំនួនត្រូវបានក្រុមហ៊ុនទាំងពីរនេះកាប់នៅក្រៅតំបន់ដីសម្បទានរបស់ខ្លួន ហើយដឹកចូលទៅក្នុងតំបន់ដីសម្បទានដើម្បីធ្វើឲ្យទៅជាស្របច្បាប់ មុននឹងដឹកចេញទៅប្រទេសវៀតណាម។ នេះបើយោងតាមអង្គការសង្គមស៊ីវិល និងប្រជាសហគមន៍ ដែលបានដើររុកល្បាតព្រៃ ហើយដែលបានថតជាខ្សែវីដេអូ និងរូបថត ពីសកម្មភាពកាប់បំផ្លាញព្រៃឈើដ៏ធំសម្បើមនេះ។

យោងតាមខ្សែវីដេអូ និងរូបភាព ដែលភ្នំពេញ ប៉ុស្តិ៍ទទួលបានកាលពីម្សិលមិញ បានបង្ហាញថា ឈើប្រភេទដួងចែម ធ្នង់ ផ្ចឹក ត្រូវបានគេកាប់គរជាគំនរ ដែលឈើខ្លះត្រូវបានគេអារច្រៀករួចហើយ ខ្លះនៅទាំងមូលព្រមទាំងមានម៉ាស៊ីនស្ទូច ដើម្បីស្ទូចយកទៅដាក់នៅក្នុងរថយន្តយ៉ីឌុបដែលបានដឹកចេញពីឃុំ រៀបរយ ស្រុករវៀង ខេត្តព្រះវិហារ របស់ក្រុមហ៊ុន លោកឧកញ៉ាទ្រី ភាព និងក្រុមហ៊ុន CRCK ដឹកតាមផ្លូវលំ ចូលតាមឃុំដងកាំបិត ស្រុកសណ្តាន់ ខេត្តកំពង់ធំ ដែលជាចំណុចស្តុកឈើហ៊ុបមូលនិងជាកន្លែងរោងម៉ាស៊ីនអារឈើ ដែលធ្វើអាជីវកម្មទាំងក្នុងក្រុមហ៊ុន និងក្រៅក្រុមហ៊ុនយ៉ាងច្រើនសម្បើម។

លោក ឈឹម សាវុធ អ្នកសម្របសម្រួលវេទិកាសាធារណៈនៅមជ្ឈមណ្ឌលសិទិ្ធមនុស្សកម្ពុជាដែលបានចុះទៅធ្វើការអង្កេតដោយផ្ទាល់ជាមួយប្រជាសហគមន៍បានថ្លែងថា ឈើមូលគ្រប់ប្រភេទរាប់ម៉ឺនដើមទាំងកាប់ចាស់និងកាប់ថ្មីៗ ត្រូវបានស្តុកទុកនៅក្នុងកន្លែងស្តុកឈើរបស់ក្រុមហ៊ុន CRCK នៅក្នុងឃុំដងកាំបិត ឃុំមានរិទ្ធ និងកន្លែងស្តុកឈើទីពីរ នៅចំណុចក្បាលអូរក្រសាំង ដែលមានចម្ងាយប្រមាណ១៦ គីឡូម៉ែត្រ ពីទីតាំងទី១ ហើយកម្មករដែលធ្វើការឲ្យក្រុមហ៊ុននេះ បានអះអាងថាឈើដ៏ច្រើនសម្បើមទាំងនេះ បានដឹកចេញពីព្រៃឡង់ តាមផ្លូវចំនួន៣ខ្សែ។ លោកឲ្យដឹងទៀតថា៖ «ព្រៃឡង់កំពុងរងនូវការកាប់បំផ្លាញធ្វើអាជីវកម្មយ៉ាងរង្គាលពីសំណាក់ក្រុមហ៊ុនដែលទទួលបានដីសម្បទានពីរដ្ឋាភិបាលចំនួនពីរគឺក្រុមហ៊ុនរបស់លោកឧកញ៉ា ទ្រី ភាព និងក្រុមហ៊ុនវៀតណាម CRCK »។

លោក សាវុធ បានឲ្យដឹងទៀតថាការដឹកជញ្ជូនឈើចេញពីក្រុមហ៊ុនមានពីរក្រុមគឺរថយន្តយីឌុបកង់១៦ និងកង់១៨ ដែលអាចផ្ទុកទម្ងន់បានពី៣០ ទៅ៥០តោន ហើយក្នុង ១ថ្ងៃយ៉ាងហោចណាស់ក៏មានរថយន្តពី១៥ទៅ២០ គ្រឿង បានបើកចូលទៅដឹកឈើនៅក្នុងក្រុមហ៊ុន ហើយដឹកចេញតាមច្រកទំរីង ឡើងទៅផ្លូវជាតិ ចេញតាមកំពង់ថ្ម រួចដឹកបន្តកាត់ខេត្តកំពង់ចាមឆ្លងចូលទៅប្រទេសវៀតណាម។ លោកបញ្ជាក់ថា៖ «ចំពោះក្រុមហ៊ុនទី្រ ភាព វិញគឺឲ្យឈ្មួញដើរប្រមូលទិញឈើនៅក្នុងស្រុកជ័យសែន ស្រុករវៀង ដោយដឹកតាមគោយន្តក្នុងមួយថ្ងៃៗមានពី២០ទៅ៣០ គោយន្ត គ្មានអាជ្ញាធរណាម្នាក់ចេញមកចាប់នោះទេ។ ខ្ញុំសោកស្តាយព្រៃឈើរកពាក្យអ្វីមកថ្លែងមិនបាននោះទេ»។

លោក ហឿន សុភាព តំណាងបណ្តាញសហគមន៍ព្រៃឡង់ នៅខេត្តកំពង់ធំ បានឲ្យដឹងថា សកម្មភាពកាប់ឈើនៅព្រៃឡង់សព្វថ្ងៃនេះ គឺកំពុងតែធ្ងន់ធ្ងរទៅៗ ដោយសារតែក្រុមហ៊ុន CRCK របស់វៀតណាម បានកាប់បំផ្លាញឈើស្ទើរតែអស់ទៅហើយដែលយ៉ាងយូរបំផុត ៣ ឆ្នាំទៀតព្រៃឡង់ នឹងក្លាយទៅជាវាលឡង់ហើយ ប្រសិនបើអាជ្ញាធរនិងរដ្ឋាភិបាល នៅតែព្រងើយកន្តើយមិនព្រមចាត់វិធានការទប់ស្កាត់ទេនោះ។

លោកបានថ្លែងថា៖«ពួកយើងសហគមន៍បានត្រឹមតែដើរល្បាតតែនៅពេលដែលយើងត្រឡប់មកវិញគេនៅតែកាប់ដដែលយើងមិនអាចទប់ស្កាត់ពួកគេបាននោះទេ»។

ក្រុមហ៊ុនដាំកៅស៊ូ វៀតណាម CRCK បានទទួលដីសម្បទានសេដ្ឋកិច្ចពីរដ្ឋាភិបាលនៅក្នុងខែឧសភាឆ្នាំ២០១០ លើផ្ទៃដីចំនួន ៦១៥៥ ហិកតាស្ថិតនៅក្នុងស្រុកសណ្តាន់។ រីឯក្រុមហ៊ុន ទី្រ ភាព អ៊ីមផតអ៊ិចផត បានទទួលដីសម្បទានសេដ្ឋកិច្ចពីរដ្ឋាភិបាល ក្នុងខែ ឧសភា ឆ្នាំ ២០១១ ក្នុងដែនជម្រកសត្វព្រៃបឹងពែរ ស្ថិតនៅក្នុងស្រុករវៀង លើផ្ទៃសរុបចំនួន ៩៩១៦ ហិកតា។ បើតាមប្រជាសហគមន៍ទីតាំងតំបន់ដីសម្បទានរបស់ក្រុមហ៊ុនទាំងពីរនេះ គឺសុទ្ធតែជាព្រៃស្រោង។

លោក NGUYEN DUY LINH ប្រធានក្រុមហ៊ុន CRCK និងលោក ឧកញ៉ា ទ្រី ភាព ពុំអាចទាក់ទង សុំការអធិប្បាយបានទេ កាលពីថ្ងៃម្សិលមិញ។

លោក ឆេង គឹម ស៊ុន ប្រធានរដ្ឋបាលព្រៃឈើពុំអាចទាក់ទងដើម្បីធ្វើការអត្ថាធិប្បាយបានឡើយកាលពីម្សិលមិញ។

ប៉ុន្តែ លោក អ៊ុត សំអន អភិបាលខេត្តកំពង់ធំបានការពារក្រុមហ៊ុនវៀតណាមដោយថ្លែងថា ក្រុមហ៊ុនរបស់វៀតណាម ស៊ី.អ.ស៊ី.ខេ ពុំមែនជាអ្នកប្រមូលឈើដោយផ្ទាល់ទេ អ្នកដែលកាប់ឈើ គឺជាក្រុមហ៊ុនរបស់ខ្មែរ ពុំមានជាប់ពាក់ព័ន្ធនឹងក្រុមហ៊ុនរបស់វៀតណាមឡើយ។ លោកបានថ្លែងថា៖«ក្រុមហ៊ុនរបស់វៀតណាម គេយកតែដីទេ គឺមានក្រុមហ៊ុនខ្មែរក្នុងស្រុក គេទទួលអាជ្ញាប័ណ្ណពីរដ្ឋ ដើម្បីកាប់ឈើមុននឹងក្រុមហ៊ុនចាប់ផ្តើមដាំកៅស៊ូ ហើយក្រុមហ៊ុននោះក៏បានបង់ពន្ធជូនរដ្ឋផងដែរ»៕ ប្រភពពី http://postkhmer.com/index.php/national/1-national-news/98431-2013-05-28-03-32-13

Tuesday, May 7, 2013

ព្រៃឡង់នៅតែត្រូវកាប់បំផ្លាញក្រោមស្លាកក្រុមហ៊ុនវៀតណាម

Posted by RothaDB at 9:50 AM 0 comments

កំពង់ធំៈ បន្ទាប់ពីការដើរល្បាតព្រៃអស់រយៈពេល៣ថ្ងៃ បណ្តាញសហគមន៍ព្រៃឡង់ ប្រមាណ ៥០ នាក់ បានធ្វើការបំផ្លាញម៉ាស៊ីនត្រង់សឺន័រអារឈើចំនួន៥គ្រឿងដែលពួកគេ រឹបអូសបានពីអ្នកកាប់ឈើ និងបានរកឃើញបទល្មើសព្រៃឈើ យ៉ាងហោចណាស់ក៏មានរថយន្តដឹកឈើហ៊ុប ដឹកឈើមូលប្រមាណពី១០ ទៅ១៥ គ្រឿងក្នុងមួយថ្ងៃៗចេញពីក្រុមហ៊ុនដីសម្បទានវៀតណាម CRCK ជាឈើដែលត្រូវបានគេកាប់នៅខាងក្រៅតំបន់ដីសម្បទានរបស់ក្រុមហ៊ុន នេះ។
លោក ហឿន សុភាព តំណាងបណ្តាញសហគមន៍ព្រៃឡង់ មកពីខេត្តកំពង់ធំ បានឲ្យដឹងថា ពលរដ្ឋបណ្តាញសហគមន៍ព្រៃឡង់បាននាំគ្នាដើរល្បាតព្រៃចំនួន៣ថ្ងៃគឺ ចាប់ពីថ្ងៃទី១ ខែឧសភា ដល់ថ្ងៃទី៣ ខែឧសភា នៅចំណុចមួយចំនួនហើយបានប្រទះឃើញបទល្មើសព្រៃឈើនៅក្នុងព្រៃឡង់ យ៉ាងច្រើនមានការកាប់ឆ្ការព្រៃធ្វើចម្ការនិងការកាប់ព្រៃយកឈើ លក់ឲ្យឈ្មួញ រីឯក្រុមហ៊ុនវិញបានដឹកជញ្ជូនឈើយ៉ាងសស្រាក់សស្រាំទៅដាក់ក្នុង ក្រុមហ៊ុនដីសម្បទានវៀតណាមCRCK ដើម្បីប្រែកា្លយឈើដែលត្រូវបានកាប់ដោយខុសច្បាប់នៅក្រៅតំបន់ដី សម្បទានឲ្យទៅជាឈើស្របច្បាប់ដែលកាប់នៅក្នុងតំបន់ដីសម្បទានវិញ ។ លោកបានបញ្ជាក់ថា៖ «ខ្ញុំស្តាយណាស់ពីព្រោះក្នុងមួយថ្ងៃរថយន្តដឹកឈើចេញប្រមាណពី ១០ទៅ១៥ គ្រឿង ហើយនៅក្នុងមួយឡានផ្ទុកឈើប្រមាណពី៤០ទៅ៥០ម៉ែត្រគុបដូច្នេះតើ ព្រៃឡង់នឹងត្រូវកាប់អស់ក្នុងពេលឆាប់ៗនេះ»។
នៅក្នុងរយៈពេលបីថ្ងៃ ដែលក្រុមសហគមន៍នាំគ្នាដើរល្បាតព្រៃរឹបអូសបានម៉ាស៊ីនត្រង់សឺន័រ ចំនួន ៥គ្រឿងឈើដែលអារទុកចោលប្រមាណ៣០ ម៉ែត្រគុប និងបានរាប់ឃើញរថយន្តដឹកឈើមូលចេញពីក្រុមហ៊ុន CRCK ប្រមាណពី ១០ ទៅ១៥ គ្រឿងក្នុងមួយថ្ងៃ។ លោកបានចោទសួរថា៖«អ្វីដែលយើងឆ្ងល់នោះគឺនៅពេលដែលយើងចាប់បាន ម៉ាស៊ីនអារឈើស្រាប់តែរដ្ឋបាលព្រៃឈើស្រុកសណ្តាន់បានទូរស័ព្ទមក ពួកយើងថាឲ្យសម្រួលគ្នាហើយប្រគល់ម៉ាស៊ីននោះ ឲ្យទៅម្ចាស់គេវិញដូច្នេះបានន័យថា បទល្មើសព្រៃឈើនៅព្រៃឡង់មានជាប់ពាក់ព័ន្ធទៅនឹងអាជ្ញាធរទាំង អស់នោះ»។
លោក ឈាង វុទ្ធី តំណាងពលរដ្ឋម្នាក់ទៀតបានឲ្យដឹងថា ម្ចាស់ម៉ាស៊ីនអារឈើ បានគំរាមកាប់ក្បាលប្រជាសហគមន៍។ លោកនិយាយថា៖ «ខ្ញុំនឹងដាក់បណ្តឹងការពារចំពោះអ្នកដែលបានមកគំរាមពួកខ្ញុំនៅ ផ្ទះពីព្រោះយើងបារម្ភថា បើថ្ងៃណាមួយ មានបញ្ហាយើងដឹងថាអ្នកណាជាអ្នកប្រព្រឹត្ត។ យើងជាអ្នកការពារព្រៃឈើតែងតែរងគ្រោះបែបនេះដូចឃើញគំរូលោកឈុត វុទ្ធី ស្រាប់ ស្រឡាញ់ព្រៃឈើស្លាប់នៅក្នុងកន្លែងព្រៃឈើតែម្តង»។

ប្រជាសហគមន៍បានព្រមានថា ប្រសិនបើអាជ្ញាធរ នៅតែមិនចាត់វិធានការទប់ស្កាត់ក្រុមហ៊ុនដែលទទួលបានដីសម្បទាន សេដ្ឋកិច្ចពីរដ្ឋាភិបាលតែបែរជាធ្វើការកាប់ឈើនៅខាងក្រៅតំបន់ដី សម្បទានរបស់ខ្លួនទេ នោះព្រៃឡង់ នឹងមិនអាចនៅស្ថិតស្ថេរបានយូរនោះទេពីព្រោះក្នុងមួយថ្ងៃៗឈើ ប្រមាណពី ៤០០ ទៅ ៥០០ ម៉ែត្រគុបត្រូវបានគេកាប់។
លោក អ៊ុត សំអន អភិបាលខេត្តកំពង់ធំ បានបដិសេធពុំធ្វើការអត្ថាធិប្បាយទេ កាលពីថ្ងៃម្សិលមិញដោយលោកមានប្រសាសន៍ថា កំពុងជាប់រវល់។
លោក ស៊ឹម វណ្ណា អភិបាលស្រុកសណ្តាន់បានទទួលស្គាល់ថា ពិតជាមានជនអនាធិបតេយ្យ ធ្វើការឈូស ឆាយ ដីព្រៃ និងកាប់ឈើលក់ខុសច្បាប់មែន ហើយសមត្ថកិច្ចកំពុងសហការជាមួយអាជ្ញាធរភូមិ-ឃុំ ដើម្បីធ្វើការទប់ស្កាត់។ លោកថ្លែងថា៖«ចំពោះក្រុមហ៊ុន CRCK គឺគេកាប់ព្រៃតែនៅក្នុងតំបន់ព្រៃគុបរបស់គេដែលទទួលបានពី រដ្ឋាភិបាលប៉ុណ្ណោះគេពុំបានប៉ះពាល់ដីព្រៃឡង់នោះទេ។ ខ្ញុំពុំបានទទួលព័ត៌មានទេទាក់ទិនទៅនឹងក្រុមហ៊ុនដែលបានដឹកឈើ ចេញទាំងឡានៗដោយពុំទាន់កែច្នៃនោះ»។
សហគមន៍ព្រៃឡង់តែងតែទទូចនិងជំរុញម្តងហើយម្តងទៀត ឲ្យរាជរដ្ឋាភិបាលអនុម័តលើសេចក្តីព្រាងអនុក្រឹត្យស្តីពីការបង្កើត តំបន់ព្រៃការពារ និងអភិរក្សជីវចម្រុះ«ព្រៃឡង់».ឲ្យបានឆាប់ ដើម្បីទប់ស្កាត់បទល្មើសទាន់ពេលវេលានិងអំពាវនាវឲ្យរដ្ឋាភិបាល សហការក្នុងការការពារ ព្រៃឡង់រួមគ្នា។
លោក ឈឹម សាវុធ អ្នកសម្របសម្រួល សម្រាប់វេទិកាសាធារណៈ នៅមជ្ឈមណ្ឌល សិទិ្ធមនុស្សកម្ពុជា បានថ្លែងថា ព្រៃឡង់កំពុងតែទទួលរងនូវការវិនាសកម្មយ៉ាងធ្ងន់ធ្ងរនៅក្នុង អំឡុង១ឆ្នាំចុងក្រោយនេះដោយសារតែអាជ្ញាធរមូលដ្ឋានមានជាប់ពាក់ ព័ន្ធនៅក្នុងការបំផ្លាញព្រៃឈើទាំងអស់នោះ។ លោកនិយាយថា ៖ «សព្វថ្ងៃនេះគេនាំគ្នាកាប់ឈើក្នុងព្រៃឡង់ ទិញពីប្រជាពលរដ្ឋហើយដឹកឈើទាំងអស់នោះទៅដាក់ក្នុងក្រុមហ៊ុន CRCK របស់វៀតណាមដើម្បីឲ្យវាស្របច្បាប់តាមពិតក្រុមហ៊ុននោះបានឈូសឆាយ ដីព្រៃដែលទទួលពីរដ្ឋាភិបាលនោះរួចរាល់អស់ហើយគ្មាននៅសល់ទៀតនោះ ទេ»។
យោងតាមរបាយការណ៍របស់សមាគមការពារសិទ្ធិមនុស្សអាដហុក ដែលបានចេញផ្សាយកាលពីឆ្នាំ ២០១២បានឲ្យដឹងថា យ៉ាងហោចណាស់ក៏មានក្រុមហ៊ុនចំនួន ៣៣ ដែលបានទទួលដីសម្បទានសេដ្ឋកិច្ចពីរដ្ឋាភិបាលដើម្បីធ្វើការវិនិយោគ នៅក្នុងតំបន់ព្រៃឡង់ដែលមានផ្ទៃដីសរុបចំនួន១០៤៥៨៥៧ ហិកតា ក្នុងនោះដីសម្បទានព្រៃឈើមានចំនួន៧៤៤៧២០ ហិកតា ដែលមានក្រុមហ៊ុនចំនួន៥ ដីសម្បទានសេដ្ឋកិច្ចមានចំនួន ១២០៦៩៥ហិកតា ដែលមានក្រុមហ៊ុនចំនួន១៤ និងដីសម្បទានរ៉ែមានចំនួន ១៨០៤៤២ ហិកតា ដែលមានក្រុមហ៊ុនចំនួន១៤៕ ប្រភពពី Postkhmer.com

Monday, June 17, 2013

សហគមន៍នៅមណ្ឌលគិរីគ្រោងប្ដឹងរឿងកាប់ឈើខុសច្បាប់

Wednesday, May 29, 2013

គំនរឈើហ៊ុបច្រើនសម្បើមក្នុងដីសម្បទានព្រៃឡង់

Tuesday, May 7, 2013

ព្រៃឡង់នៅតែត្រូវកាប់បំផ្លាញក្រោមស្លាកក្រុមហ៊ុនវៀតណាម

បកប្រែតម្រូវតាមភាសា

Blogger news

My Stat Counter

Subscribe with Me Here

មាតិកា

Blog Archive

កម្រងមាតិកា

តំណភ្ជាប់ខាងក្រៅ

ចំនួនមិត្តអ្នកអាន

Labels

Popular Posts

តំណភ្ជាប់ទំព័រព័ត៌មាន

Monday, June 17, 2013

សហគមន៍​នៅ​មណ្ឌលគិរី​គ្រោង​ប្ដឹង​រឿង​កាប់​ឈើ​ខុស​ច្បាប់

Wednesday, May 29, 2013

គំនរ​ឈើ​ហ៊ុប​ច្រើន​សម្បើម​ក្នុង​ដី​សម្បទាន​ព្រៃឡង់

Tuesday, May 7, 2013

ព្រៃឡង់​នៅ​តែ​ត្រូវ​កាប់​បំផ្លាញ​ក្រោម​ស្លាក​ក្រុមហ៊ុន​វៀតណាម

បកប្រែតម្រូវតាមភាសា

Blogger news

My Stat Counter

Subscribe with Me Here

មាតិកា

Blog Archive

កម្រងមាតិកា

តំណភ្ជាប់ខាងក្រៅ

ចំនួនមិត្តអ្នកអាន

Labels

Popular Posts

តំណភ្ជាប់ទំព័រព័ត៌មាន

សហគមន៍នៅមណ្ឌលគិរីគ្រោងប្ដឹងរឿងកាប់ឈើខុសច្បាប់

គំនរឈើហ៊ុបច្រើនសម្បើមក្នុងដីសម្បទានព្រៃឡង់

ព្រៃឡង់នៅតែត្រូវកាប់បំផ្លាញក្រោមស្លាកក្រុមហ៊ុនវៀតណាម