ព័ត៌មានដើមស្វាយ

Showing posts with label គ.ជ.ប. Show all posts

Thursday, October 17, 2013

សាលាក្រុង នឹងជួបប្រជុំជាមួយតំណាងគណបក្សសង្គ្រោះជាតិ នៅព្រឹកថ្ងៃទី១៨តុលា

Posted by RothaDB at 6:48 PM 0 comments

ប្រភពមកពី CEN.com.kh : ភ្នំពេញ: លោក ឃួង ស្រេង អភិបាលរង សាលារាជធានីភ្នំពេញ បានមានប្រសាសន៍ឲ្យដឹងថា ខាងសាលារាជធានីភ្នំពេញ បានទទួលលិខិតជូនស្តីពីការធ្វើមហាបាតុកម្មរបស់គណបក្សសង្គ្រោះជាតិ រួចហើយ។ នៅថ្ងៃទី១៨ ខែតុលា លោកនឹងប្រជុំពិភាក្សាជាមួយតំណាងខាងគណបក្ស សង្គ្រោះជាតិ អំពីការធ្វើបាតុកម្មរបស់គណបក្សសង្គ្រោះជាតិ។

លោក ឃួង ស្រេង បានបញ្ជាក់ថា សាលារាជធានីភ្នំពេញ មានសិទ្ធិអនុញ្ញាតឲ្យធ្វើបាតុកម្មតែក្រោម ២០០ នាក់ទេ។ បើលើសពី ២០០ នាក់ ត្រូវសំណើទៅក្រសួងមហាផ្ទៃ។

លោក ឃួង ស្រេង បានលើកឡើងថា ទាក់ទងការធ្វើបាតុកម្មនេះ បើតាមទស្សនៈផ្ទាល់ខ្លួនរបស់លោក គឺចំពោះរដ្ឋសភា និងរាជរដ្ឋាភិបាល គឺបានសម្រេចអស់ហើយ ហើយគាត់នៅតវ៉ាអំពីបញ្ហាអ្វីទៀត សាលារាជធានីភ្នំពេញ និងពិនិត្យមើលសំណើរបស់គណបក្សសង្គ្រោះជាតិ លើបបញ្ហានេះ។

លោកអភិបាលរង បន្តថា គួរតែគណបក្សប្រឆាំង បង្វែរការធ្វើបាតុកម្មទៅពិនិត្យមើលប្រជាជន ដែលកំពុងតែរងគ្រោះដោយសារទឹកជំនន់ល្អជាង។

សូមរម្លឹកថា អ្នកដឹកនាំបាតុកម្ម នៃគណបក្សសង្គ្រោះជាតិ បានដាក់លិខិតជូនដំណឹង ស្តីពី ការធ្វើមហាបាតុកម្មអហិង្សា និងដង្ហែក្បួនដោយសន្តិវិធីរយៈពេល ៣ថ្ងៃ គឺចាប់ពីថ្ងៃទី២៣.២៤.២៥ ខែតុលា ទៅអភិបាលសាលារាជធានីភ្នំពេញ កាលពីថ្ងៃទី១៦ ខែតុលា ឆ្នាំ២០១៣ ដើម្បីស្វែងរកការពិត និងយុត្តិធម៌ជូនប្រជាពលរដ្ឋ ពាក់ព័ន្ធភាពមិនប្រក្រតីនៃការបោះឆ្នោត និងទាមទារឲ្យរដ្ឋាភិបាល គោរពឲ្យបានពេញលេញតាមកិច្ចព្រមព្រៀងទីក្រុងប៉ារីស៕

Wednesday, June 26, 2013

អតីតសមាជិកបក្សប្រឆាំងអះអាងថាដឹកនាំសកម្មជនជាង៦០០នាក់ចូលបក្សប្រជាជន

Posted by RothaDB at 8:16 AM 0 comments

ប្រភពពីអតីតសកម្មជន គណបក្ស សម រង្ស៊ី បានឱ្យដឹងថា សកម្មជនគណបក្ស សម រង្ស៊ី និងគណបក្សសង្គ្រោះជាតិ នៅខេត្តសៀមរាប និងនៅតាមបណ្ដាស្រុកខ្លះទៀតចំនួនប្រមាណជាង ៦០០នាក់ ទៅចុះចូលជាមួយគណបក្សប្រជាជនកម្ពុជា ដែលជាគណបក្សកាន់អំណាច។

មន្ត្រីគណបក្សប្រជាជនកម្ពុជា បានរៀបចំកម្មវិធីទទួលយកសកម្មជនគណបក្សប្រឆាំងទាំងនោះកាលពីថ្ងៃ ទី២៤ ខែមិថុនា នៅឯស្រុកស្វាយលើ ចម្ងាយប្រមាណជាង ៧០គីឡូម៉ែត្រភាគឦសានពីទីរួមខេត្តសៀមរាប។

មេចលនាអូសទាញមនុស្សចេញពីគណបក្ស ប្រឆាំងមួយក្រុម ហើយទៅចុះចូលជាមួយនឹងគណបក្សប្រជាជនកម្ពុជា បានរិះគន់ថា ពួកគេមិនអាចទ្រាំនៅបានទៀតទេ ដោយសារតែមន្ត្រីធំៗក្នុងជួរគណបក្សប្រឆាំងគិតតែពីពង្រឹងអំណាច ផ្ទាល់ខ្លួន ដោយមិនគិតផលប្រយោជន៍គណបក្ស។

ការលើកឡើងបែបនេះ បន្ទាប់ពីអតីតសមាជិកក្រុមប្រឹក្សាខេត្តម្នាក់ និងអតីតក្រុមការងារគណបក្ស សម រង្ស៊ី ខ្លះទៀតនៅខេត្តសៀមរាប បានទៅចូលរួមជាមួយគណបក្សប្រជាជនកម្ពុជា។

អតីតអនុប្រធានរដ្ឋបាលរបស់គណបក្ស សម រង្ស៊ី ខេត្តសៀមរាប គឺលោក ឆាន ប៉ូឡូ។ លោកបានមានប្រសាសន៍ថា លោកបានដឹកនាំសកម្មជនថ្នាក់ខេត្ត ស្រុក និងឃុំខ្លះរបស់គណបក្ស សម រង្ស៊ី និងគណបក្សសង្គ្រោះជាតិ ចំនួន ៦២៣នាក់ ទៅចូលរួមជាមួយគណបក្សប្រជាជនកម្ពុជា កាលពីពេលថ្មីៗ៖ «មូលហេតុ ចម្បងដែលពួកយើងខ្ញុំទាំងអស់គ្នាចាកចេញពីគណបក្ស សម រង្ស៊ី និងគណបក្សសង្គ្រោះជាតិ ដោយសារតែថ្នាក់ដឹកនាំកំពូលៗ គឺគិតតែពីប្រយោជន៍លាភសក្ការៈ និងបក្ខពួកនិយម ហើយជាមនុស្សដែលមិនសូវគិតធ្វើម៉េចឱ្យបក្សខ្លាំងទេ គិតតែពីធ្វើយ៉ាងម៉េចឱ្យតែក្រុម ឬក៏បក្ខពួករបស់គាត់ហ្នឹងខ្លាំង ទោះបីជាធ្វើឱ្យបក្សហ្នឹងខ្សោយទន់ក៏ដោយ»។

អភិបាលស្រុក និងជាប្រធានគណបក្សប្រជាជនកម្ពុជា ប្រចាំស្រុកស្វាយលើ លោក សិ ប៊ុនស៊ិន បានមានប្រសាសន៍ថា សកម្មជន និងអ្នកគាំទ្រគណបក្សប្រឆាំងទាំងនោះមកពីច្រើនកន្លែង ហើយស្រុករបស់លោកបានរៀបចំធ្វើពិធីទទួលយកពួកគេ។

នេះមិនមែនជារឿងថ្មីទេដែលសកម្មជន ឬសមាជិកគណបក្សប្រឆាំង និងគណបក្សផ្សេងៗបានផ្តាច់ខ្លួនចេញពីគណបក្សរបស់គេទៅចូលរួមជាមួយ គណបក្សប្រជាជនកម្ពុជា ដែលជាគណបក្សកាន់អំណាច។ ស្ទើរតែរាល់ពេលនៃការបោះឆ្នោតជិតមកដល់ បញ្ហាចាកចេញពីគណបក្សមួយ ចូលទៅគណបក្សមួយទៀត គឺតែងកើតមានជាច្រើនលើកមកហើយ។

ទោះយ៉ាងណា អនុប្រធានក្រុមការងារគណបក្សសង្គ្រោះជាតិ ខេត្តសៀមរាប លោក សុខ គឹមសេង បានឱ្យដឹងថា មេខ្យល់ដែលដឹកនាំមនុស្សមួយចំនួនទៅចុះចូលជាមួយគណបក្សប្រជាជន កម្ពុជា នោះ គឺជាអតីតសកម្មជនគណបក្ស សម រង្ស៊ី ដែលគណបក្សបានដកហូតតួនាទីកាលពីជាង ៦ខែមុន ហើយមិនមានចំនួនមនុស្សរាប់រយនាក់ទៅចុះចូលដូចគេអះអាងនោះឡើយ។

លោក សុខ គឹមសេង៖ «ជាការពិត ពួកគាត់ហ្នឹងជាអតីតគណបក្ស សម រង្ស៊ី ដែលត្រូវបានគណបក្សដកចេញពីតួនាទី និងដកចេញពីសមាជិកភាព ដោយសារតែគាត់ប្រព្រឹត្តនូវទោសកំហុសជាច្រើន តាំងពីខែធ្នូ ឆ្នាំ២០១២។ គាត់មិនមែនជាសមាជិកគណបក្សសង្គ្រោះជាតិ ទេ។ ព័ត៌មាន គឺគណបក្សប្រជាជនកម្ពុជា ចូលចិត្តតែបំផ្លើសអីចឹង ប៉ុន្តែតាមការពិត យើងឃើញហើយតែគ្នាគាត់ប៉ុន្មាននាក់ ដែលគណបក្ស សម រង្ស៊ី ដកហូតតំណែង ដោយសារតែគាត់មានកំហុសខុសឆ្គងមិនគោរពបទបញ្ជាផ្ទៃក្នុងតែ ប៉ុណ្ណឹង។ ក៏ប៉ុន្តែ សកម្មជនដទៃទៀតអត់មានការចុះចូលទេ»។

នាយកប្រតិបត្តិគណៈកម្មាធិការដើម្បីការ បោះឆ្នោតដោយសេរី និងយុត្តិធម៌នៅកម្ពុជា ខុមហ្វ្រែល (COMFREL) លោក គល់ បញ្ញា បានមានប្រសាសន៍ថា ប្រជាពលរដ្ឋម្នាក់ៗមានសិទ្ធិគ្រប់គ្រាន់ក្នុងការជ្រើសរើសគណបក្ស ដែលខ្លួនស្រឡាញ់ ក៏ប៉ុន្តែការចាកចេញរបស់សមាជិកនៃគណបក្សនយោបាយមួយទៅចុះចូលជាមួយ គណបក្សនយោបាយមួយទៀត បើទោះបីជាមិនប៉ះពាល់ធំដុំ ក៏វាអាចនឹងប៉ះពាល់ទៅដល់អារម្មណ៍អ្នកបោះឆ្នោតខ្លះៗ។

មិនមែនតែខេត្តសៀមរាប ទេ ដែលមានការអះអាងថា សមាជិកគណបក្សប្រឆាំងបានទៅចុះចូលជាមួយគណបក្សប្រជាជនកម្ពុជា គឺនៅខេត្តកំពត ខេត្តកណ្ដាល និងតំបន់មួយចំនួនទៀត ក៏មានសេចក្តីរាយការណ៍ពីការចុះចូលដូចគ្នានេះដែរ។

ទោះយ៉ាងណា ប្រធានគណៈកម្មការប្រតិបត្តិគណបក្សសង្គ្រោះជាតិ នៅខេត្តកណ្ដាល លោក ធួង សុខា បានអះអាងថា ពុំមានសមាជិកគណបក្សសង្គ្រោះជាតិ ណាមួយបានចុះចូលជាមួយគណបក្សប្រជាជនកម្ពុជា ដូចព័ត៌មានផ្សព្វផ្សាយនោះទេ។ លោក ធួង សុខា បញ្ជាក់ថា បុរសម្នាក់ឈ្មោះ ហ៊ល សំនៀង ដែលទៅចុះចូលជាមួយគណបក្សប្រជាជនកម្ពុជា នោះ មិនមែនជាប្រធានគណៈកម្មការប្រតិបត្តិគណបក្សសង្គ្រោះជាតិ នៅខេត្តកណ្ដាល ឡើយ គឺគ្រាន់តែជាអតីតសកម្មជនគណបក្ស សិទ្ធិមនុស្ស ដែលបានដកហូតពីតួនាទីជាយូរមកហើយ៕ ប្រភពព័ត៌មាន ៖ RFA

Monday, June 24, 2013

បទវិភាគ៖ តើមធ្យោបាយប្រជែងគ្នារបស់បក្សធំៗ២ចំណេញជាតិឬទេ?

Posted by RothaDB at 8:13 AM 0 comments

ប្រទេសកម្ពុជា ឆ្លងកាត់ការបោះឆ្នោតជ្រើសតាំងតំណាងរាស្ត្រចំនួន ៤ដងទៅហើយ។ នៅសល់រយៈពេលជាង១ខែទៀត ការបោះឆ្នោតជ្រើសតាំងតំណាងរាស្ត្រនីតិកាលទី៥ នឹងចូលមកដល់។ អ្នកនយោបាយគណបក្សធំពីរ គឺប្រជាជនកម្ពុជា និងគណបក្សសង្គ្រោះជាតិ ក៏ចាប់ផ្ដើមប្រើប្រាស់គ្រប់មធ្យោបាយដើម្បីទាក់ទាញសន្លឹកឆ្នោតពី សំណាក់ប្រជាពលរដ្ឋ។

តើមធ្យោបាយប្រជែងគ្នារបស់គណបក្សទាំងពីរមានផលប្រយោជន៍ឬទេចំពោះប្រជាពលរដ្ឋខ្មែរ?

មិនខុសពីការបោះឆ្នោតមុនៗទេ គណបក្សកាន់អំណាចនៅតែប្រើយុទ្ធសាស្ត្រដដែលៗដើម្បីស្រូបទាញ ប្រជាប្រិយភាពរបស់ខ្លួន។ បន្ទាប់ពីគណបក្សសង្គ្រោះជាតិចាប់ផ្ដើមប្រារព្ធសមាជរួមបញ្ចូលគ្នា ជាផ្លូវការនៅថ្ងៃទី៧ ខែមេសា ឆ្នាំ២០១៣ រួចមក គណបក្សប្រជាជនកម្ពុជា ក៏ប្រើប្រាស់អង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី ដែលជាស្ថាប័នរដ្ឋ ទៅវាយប្រហារគណបក្សប្រឆាំង។

អង្គភាពនេះបានផ្សព្វផ្សាយខ្សែអាត់ សំឡេងដែលជាការទិតៀនគ្នាទៅ វិញទៅមករបស់លោក សម រង្ស៉ី និងលោក កឹម សុខា កាលពីមិនទាន់ជាគ្នា ព្រមទាំងដាក់ឈ្មោះខ្សែអាត់នោះថា អាយ៉ៃឆ្លើយឆ្លង និងត្រូវបានមន្ត្រីបក្សកាន់អំណាចយកទៅប្រាប់ពលរដ្ឋថា មេបក្សប្រឆាំងទាំង២ មិនអាចរួបរួមគ្នាបានទេ។

មុខរបួសគណបក្សប្រឆាំងប៉ង់សឺម៉ង់ (រុំរបួស) មិនទាន់ជិតស្រួលបួលផង ត្រូវគណបក្សកាន់អំណាចយកឈើចាក់បន្ថែមទៀ ក្រោយការចាក់ផ្សាយអំពីការធ្លាប់បែកបាក់គ្នារវាងមេបក្សទាំងពីរ មិនបានប៉ុន្មានផង លោក កឹម សុខុន ដែលជាប្អូនប្រុសបង្កើតរបស់លោក កឹម សុខា ចាប់ផ្ដើមវាយប្រហារទៅលើបងរបស់ខ្លួន ដោយមានខ្លឹមសារសំខាន់ គឺធ្វើយ៉ាងម៉េចកុំឲ្យពលរដ្ឋជឿលើគោលនយោបាយគណបក្សសង្គ្រោះជាតិ។ សំដីរបស់លោក កឹម សុខុន បានត្រូវគេយកទៅផ្សព្វផ្សាយស្ទើរគ្រប់កញ្ចក់ទូរទស្សន៍ក្នុង ប្រទេស។ ល្បិចនេះត្រូវបានគណបក្សប្រជាជនប្រើប្រាស់ម្ដងរួចទៅហើយកាលទសវត្ស ១៩៩០ ដែលគណបក្សនេះយកព្រះអង្គម្ចាស់ នរោត្ដម ចក្រពង្ស់ ទៅបង្អាប់សម្ដេចក្រុមព្រះ នរោត្តម រណឫទ្ធិ។

លោក កឹម សុខុន ក៏ត្រូវបានគណបក្សកាន់អំណាចផ្ដល់រង្វាន់ជាអនុប្រធាននាយកដ្ឋាន កណ្ដាល សន្តិសុខក្រសួងមហាផ្ទៃ ពាក់ផ្កាយពីរ។

បន្ទាប់ពីប្អូនប្រុសលោក កឹម សុខា បានតំណែងរួចមក គណបក្សកាន់អំណាចនៅតែយកទឹកអាស៊ីដទៅលាងមុខរបួសបក្សប្រឆាំងដែល កំពុងរីកនោះ។ គណបក្សប្រជាជនលាតត្រដាងខ្សែអាត់សំឡេងរបស់លោក កឹម សុខា ដែលមានពាក្យនិយាយថា គុកទួលស្លែងជាឆាកដែលវៀតណាមបង្កើត។គ្រាន់តែលឺពាក្យនេះភ្លាម លោក ជុំ ម៉ី ដែលជាអ្នកមិនគាំទ្រគណបក្សប្រឆាំងស្រាប់ផងនោះ ក៏បានប្រកាសតិះដៀលលោក កឹម សុខា ថាជាអ្នកបំភ្លៃប្រវត្តិសាស្ត្រ និងទាមទារឲ្យអ្នកនយោបាយបក្សប្រឆាំងមួយនេះ សូមអភ័យទោសជាសាធារណៈ។

បន្ទាប់ពីគ្មានការសូមអភ័យទោស លោកនាយករដ្ឋមន្ត្រី ហ៊ុន សែន ក៏បង្ហើបមុនលោក ជុំ ម៉ី ដោយទំនងជាដឹងមុនថា អាចនឹងមានបាតុកម្មប្រឆាំងលោក កឹម សុខា។ ភ្លាមៗនោះ លោក ជុំ ម៉ី ក៏បានចេញលិខិតមួយស្នើឲ្យពលរដ្ឋទូទាំងប្រទេសក្រោកឈរឡើង ធ្វើបាតុកម្មអហិង្សាប្រឆាំងលោក កឹម សុខា។ មនុស្សជាង ៣ម៉ឺននាក់់ សុទ្ធជាអ្នកគាំទ្រគណបក្សប្រជាជនកម្ពុជា នៅទូទាំងប្រទេស ចេញធ្វើបាតុកម្មព្រមៗគ្នា យកញត្តិដាក់នៅទីស្នាក់ការគណបក្សសង្គ្រោះជាតិ។

ស្របគ្នានោះ លោក ហ៊ុន សែន បញ្ជាឲ្យតំណាងរាស្ត្រគណបក្សប្រជាជនកម្ពុជា និងគណបក្សហ៊្វុនស៊ិនប៉ិច អនុម័តច្បាប់ប្រឆាំងអ្នកមិនទទួលស្គាល់ឧក្រិដ្ឋកម្មក្នុងរបបប្រល័យ ពូជសាសន៍ខ្មែរក្រហមយ៉ាងឆាប់រហ័ស ទោះបីជារងការរិះគន់ពីសង្គមស៊ីវិលថា មិនបានសិក្សាឲ្យគ្រប់ជ្រុងជ្រោយក៏ដោយ។

ឃើញមុខរបួសគណបក្សប្រឆាំងកាន់តែ ដុនដាបទៅៗ លោក ហ៊ុន សែន ក៏បានជួយអង្អែលលេងបន្តិចៗ ដោយអំពាវនាវកុំឲ្យពលរដ្ឋធ្វើបាតុកម្មប្រឆាំងលោក កឹម សុខា តទៅទៀត។ តែធាតុពិតគណបក្សប្រឆាំងមិនបានធូរស្រាលប៉ុន្មានទេ។ ផ្អាកបាតុកម្មមែន តែលោក កឹម សុខា បែរជាត្រូវដើរជាន់បន្លាបន្ថែមទៀត។ បណ្ដឹងចំនួន ២ បានទៅដល់ដៃតុលាការខេត្តស្វាយរៀង និងតុលាការរាជធានីភ្នំពេញ។ ករណីទី១ ជាបណ្ដឹងរបស់ស្ត្រីម្នាក់ ឈ្មោះ សំ ផល្លា ជាម្ដាយរបស់ស្ត្រីដែលអះអាងថា ជាស្រីកំណាន់របស់លោក កឹម សុខា កាលពីជាង ១០ឆ្នាំមុន ដែលប្ដឹងពីបទប្រើប្រាស់អំពើហិង្សាក្នុងអំឡុងពេលលោក កឹម សុខា ចុះទៅជួបសកម្មជនគណបក្សសង្គ្រោះជាតិ នៅខេត្តព្រៃវែង កាលពីថ្ងៃទី១២ ខែមិថុនា។ ករណីទី២ ជាបណ្ដឹងលោក ជុំ ម៉ី ប្ដឹងប្រឆាំងលោក កឹម សុខា ពីបទបរិហារកេរ្តិ៍ ទៅសាលាដំបូងរាជធានីភ្នំពេញ នូវពាក្យដែលលោក កឹម សុខា ទំនងជាបាននិយាយថា គុកទួលស្លែងជាឆាកដែលវៀតណាម បង្កើត។

ចំណែកឯគណបក្សប្រឆាំងវិញ ចាប់ពីបង្រួបបង្រួមគ្នាជាផ្លូវការមក គណបក្សនេះផ្តើមដោយគោលនយោបាយដូចការបាញ់គ្រាប់កាំភ្លើង ដែលគណបក្សកាន់អំណាចមិនធ្លាប់ហ៊ានបាញ់ទាល់តែសោះ។

គោលនយោបាយ ៧ចំណុចរបស់គណបក្សប្រឆាំង មានផ្ដល់ប្រាក់ឧបត្ថម្ភដល់មនុស្សមានអាយុចាប់ពី ៦៤ ឡើងទៅចំនួន ៤ម៉ឺនរៀលក្នុងមួយខែ ដំឡើងប្រាក់ខែមន្ត្រីរាជការ កម្មករ ផ្ដល់សេវាសុខភាពមិនបង់ប្រាក់ចំពោះជនក្រីក្រ ផ្ដល់ការអប់រំ និងបញ្ចុះតម្លៃប្រេងសាំង ជីកសិកម្ម អគ្គីសនី ជាដើម។

ពេលបាញ់កាំភ្លើងតូចបើកផ្លូវហើយ គណបក្សប្រឆាំងបាញ់កាំភ្លើងធំតែម្ដង គឺប្រកាសធ្វើមហាបាតុកម្មដើម្បីកែទម្រង់គណៈកម្មាធិការជាតិរៀបចំ ការបោះឆ្នោត (គ.ជ.ប) តាមអនុសាសន៍សង្គមស៊ីវិល និងអនុសាសន៍របស់តំណាងពិសេសទទួលបន្ទុកផ្នែកសិទ្ធិមនុស្សរបស់ អង្គការសហប្រជាជាតិ លោក សុរិយ៉ា ស៊ូប៊ែឌី (Surya Subedi)។ បាតុកម្មទី១នេះ ធ្វើឡើងនៅថ្ងៃទី២៤ ខែមេសា ដើម្បីយកញត្តិទៅដាក់ជូន គ.ជ.ប។ កងកម្លាំងសន្តិសុខរាប់ពាន់នាក់ បានដាក់ពង្រាយដើម្បីទប់ស្កាត់និងបង្រ្កាប ប៉ុន្តែគណបក្សសង្គ្រោះជាតិ មិនបានហែក្បួនឡើយ ដោយគ្រាន់តែរង់ចាំប្រគល់ញត្តិឲ្យ គ.ជ.ប នៅនឹងទីលានសេរីភាពប៉ុណ្ណោះ។

បាតុកម្មនេះត្រូវបានអ្នកវិភាគចាត់ ទុកថា ជាការសាកល្បងពីសន្ទស្សន៍នៃការគាំទ្រ និងវាស់ស្ទង់ពីទំហំទប់ទល់ និងបង្ក្រាបពីសំណាក់អាជ្ញាធរប៉ុណ្ណោះ។ ពេលនោះមន្ត្រី គ.ជ.ប បានបដិសេធមិនធ្វើការផ្លាស់ប្ដូរអ្វីបន្តិចឡើយ ហើយចាត់ទុកថា ញត្តិគណបក្សប្រឆាំងមិនមានតម្លៃ។

គណបក្សជំទាស់ប្រកាសធ្វើបាតុកម្មទី២ នៅថ្ងៃទី២០ ខែឧសភា ស្របពេលដែលតំណាងពិសេសអង្គការសហប្រជាជាតិ ទទួលបន្ទុកផ្នែកសិទ្ធិមនុស្សមកបំពេញទស្សនកិច្ចនៅកម្ពុជា។ ការជួបជុំនោះមានមនុស្សជាង ៥ពាន់នាក់ចូលរួម ដើម្បីដាក់ញត្តិទៅកាន់ស្ថានទូតសហគមន៍អឺរ៉ុប និងការិយាល័យអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំ នៅកម្ពុជា។ ហើយមានតែសកម្មជនបក្សប្រឆាំង ១០០នាក់ប៉ុណ្ណោះ ដែលអាជ្ញាធររាជធានីភ្នំពេញ អនុញ្ញាតឲ្យហែក្បួន។ ប៉ុន្តែដល់ពេលហែក្បួនពិតប្រាកដ សកម្មជនគណបក្សប្រឆាំងជាង ៥ពាន់នាក់បានទម្លុះរនាំងសមត្ថកិច្ចដើរហែក្បួនដាក់ញត្តិតាម បំណង។

មន្ត្រីបក្សប្រឆាំងចូលជួបមន្ត្រី អង្គការសហប្រជាជាតិ និងមន្ត្រីសហគមន៍អឺរ៉ុប សុំឲ្យភាគីអន្តរជាតិទាំងពីរដាក់សម្ពាធលើរដ្ឋាភិបាលកម្ពុជា ឲ្យធ្វើកំណែទម្រង់ គ.ជ.ប និងអន្តរាគមន៍យកលោក សម រង្ស៉ី ចូលស្រុកវិញ។ រីឯលោក សម រង្ស៉ី គេមិនរំពឹងថា នឹងបានចូលស្រុកវិញនោះ ក៏បានដើរប្រកូកប្រកាសប្រាប់អន្តរជាតិឲ្យជួយ។ រហូតដល់រដ្ឋាភិបាលថៃ ដឹកនាំដោយអ្នកស្រី យីងឡាក់ ស៊ីណាវ៉ាត់ (Yingluck Shinawatra) ដែលជិតស្និទ្ធនឹងលោក ហ៊ុន សែន មិនឲ្យចូលស្រុកថៃ ទៀត ក្រោមហេតុផលរក្សាទំនាក់ទំនងល្អរវាងរាជរដ្ឋាភិបាលនៃប្រទេសទាំងពីរ។

ក្រៅពីប្រើកាំភ្លើងធំៗ បាញ់លើគណបក្សប្រជាជន គណបក្សប្រឆាំងថែមទាំងប្រើគ្រាប់បែកបោកបន្តកន្ទុយគ្នាទៀត។ បក្សកាន់អំណាចត្រូវបានគណបក្សប្រឆាំងលាតត្រដាងនៅឆាកអន្តរជាតិលើ បញ្ហាមួយចំនួន ដូចជាការរំលោភសិទ្ធិមនុស្ស ការរំលោភបំពានដីធ្លី និទណ្ឌភាព ឬភាពគ្មានទោសពៃរ៍ ការគាបសង្កត់ផ្នែកនយោបាយជាដើម។ ចំណែកឯនៅក្នុងប្រទេស គណបក្សប្រឆាំងបានរិះគន់ពីអសមត្ថភាពក្នុងការអនុវត្តច្បាប់ អន្តោប្រវេសន៍ ដែលផ្ដោតសំខាន់លើអន្តោប្រវេសន៍ពីប្រទេសវៀតណាម។

បេក្ខជនតំណាងរាស្ត្រគណបក្សសង្គ្រោះ ជាតិ កាលពីចុងសប្ដាហ៍មុន ថែមទាំងដាក់ពាក្យប្ដឹងលោក ហ៊ុន សែន ពីបទក្លែងឯកសារសាធារណៈទៅសាលាដំបូងរាជធានីភ្នំពេញ។ នៅក្នុងបណ្ដឹងនេះ ចោទលោក ហ៊ុន សែន ថា បានអនុញ្ញាតឲ្យជនអន្តោប្រវេសន៍វៀតណាម ជាង ៤ម៉ឺននាក់ រស់នៅក្នុងប្រទេសកម្ពុជា ដោយស្របច្បាប់។

សកម្មភាពរបស់គណបក្សធំៗពីរមុនការបោះ ឆ្នោតនេះ ទំនងជាចេតនាក្នុងការយកឈ្នះគ្នាម្ខាងៗ ដោយវាយប្រហារចំជីពចររសើបៗរបស់គូប្រជែងប៉ុណ្ណោះ។ ព្រឹត្តិការណ៍ទាំងនោះហាក់ដូចជាធ្វើឲ្យពលរដ្ឋជក់ចិត្ត ប៉ុន្តែមិនបានបង្ហាញជំហរច្បាស់លាស់ក្នុងការដោះស្រាយបញ្ហាជាតិនោះ ឡើយ។ ប្រជាពលរដ្ឋចាំបាច់ត្រូវប្រើប្រាស់ចំណេះដឹងជាមុនសិន មុននឹងសម្រេចចិត្តថាតើគួរបោះឆ្នោតឲ្យគណបក្សណាមួយនោះ? ប្រភពព័ត៌មាន ៖ វិទ្យុអាស៊ីសេរី

Thursday, June 6, 2013

ព្រឹកស្អែក គ.ជ.ប នឹងបើកកិច្ចប្រជុំស្តីពីការផ្សព្វផ្សាយនីតិវិធីនៃយុទ្ឋនាការឃោសនារកសំឡេងបោះឆ្នោត

Posted by RothaDB at 12:43 PM 0 comments

នៅទីស្នាក់ការកណ្តាលនៃគណៈកម្មាធិការជាតិរៀបចំ ការបោះឆ្នោត (គជប) ស្ថិតក្នុងបរិវេណក្រសួងមហាផ្ទៃ នាម៉ោង១០ព្រឹកថ្ងៃទី ០៧ មិថុនា ២០១៣នេះ មានរៀបចំបើកកិច្ចប្រជុំស្តីពីការផ្សព្វផ្សាយនីតិវិធីនៃយុទ្ឋនាការ ឃោសនារកសំឡេងឆ្នោត ។

កិច្ចប្រជុំនេះ ក្រោមអធិបតីភាពលោក សោម ច័ន្ទឌីណា សមាជិក គ.ជ.ប ព្រមទំាងមានការចូលរួមពីតំណាងគណបក្សនយោបាយទំាង៨ ដែលនឹងចូលរួមប្រកួតប្រជែងក្នុងការបោះឆ្នោតជ្រើសតំាងតំណាងរាស្រ្ត សំរាប់នីតិកាលទី៥ អង្គការសង្គមស៊ីវិល និង អ្នកកាសែតជាច្រើននាក់ទៀត ៕

ប្រភពពី http://kohsantepheapdaily.com.kh

Wednesday, May 22, 2013

ប្រធាន គ.ជ.ប ជួបជាមួយអ្នករាយការណ៍ពិសេសអង្គការសហប្រជាជាតិ

Posted by RothaDB at 8:29 AM 0 comments

ភ្នំពេញ: ប្រធានគណៈកម្មាធិការជាតិរៀបចំការបោះឆ្នោត គ.ជ.ប. លោក អ៊ឹម សួស្តី បានជួបពិភាក្សាការងារជាមួយលោក សុរិយា ប្រាសាទ ស៊ូប៊ែរឌី អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិ ប្រចាំកម្ពុជា នៅទីស្តីការ គ.ជ.ប កាលពីព្រឹកថ្ងៃទី២១ ខែឧសភា ឆ្នាំ២០១៣។

លោក អ៊ឹម សួស្តី បានមានប្រសាសន៍ ប្រាប់ក្រុមអ្នកកាសែតបន្ទាប់ពីជំនួបចប់ថា នៅក្នុងជំនួបនោះ អ្នករាយការណ៍ពិសេសអង្គការសហប្រជាជាតិ បានលើកឡើងអំពីកង្វល់អ្វីដែលគាត់បានឃើញ និងអ្វីដែលគេបានប្រាប់គាត់។
លោកក៏បានបកស្រាយទៅវិញអំពីកង្វល់ ថា អ្វីដែល គ.ជ.ប ធ្វើបានតាមផ្លូវច្បាប់ និងអ្វីដែលវាលំបាកខាងផ្លូវច្បាប់ និងអ្វីដែលលំបាកខាងបច្ចេកទេស គ.ជ.ប ប្រាប់ទាំងអស់ជុំវិញបញ្ហានេះ។

លោកបានបញ្ជាក់ថា ក្តីកង្វល់ដែលអ្នករាយការណ៍ពិសេសរបស់អង្គការសហប្រជាជាតិ បានលើកឡើងគឺ អំពីបញ្ជីបោះឆ្នោត ការប្រើមធ្យោបាយរដ្ឋ និងជុំវិញការជ្រើសរើសមន្ត្រី... ហើយការលើកឡើងនេះគឺជាការលើកឡើងដដែលៗ។ ការជួបនេះ ក៏ជាឱកាសល្អដែរ ដែលគជប បានពន្យល់ដល់អ្នករាយការណ៍ពិសេស ឲ្យយល់ពីសភាពការណ៍នៅស្រុកខ្មែរ អំពីច្បាប់នៅស្រុកខ្មែរ ដែល គ.ជ.ប បានធ្វើកន្លងមក។

លោកប្រធាន គ.ជ.ប បានលើកឡើងទៀតថា នៅក្នុងជំនួបនេះ គ.ជ.ប បើកចំហថា អ្នកណាដែលចង់ដឹង គ.ជ.ប នឹងប្រាប់។ ការជួបគ្នា រវាងរូបលោក នឹងលោក សុរិយា ស៊ូប៊ែរឌី នេះគឺជាឱកាសមួយ ដែល គ.ជ.ប ចង់ប្រាប់ដល់គាត់ថា អ្វីដែល គ.ជ.ប បានធ្វើ កំពុងធ្វើ ហើយការលំបាក ដែល គ.ជ.ប បានជួបប្រទះ។

ចំណែកលោក សុរិយា ស៊ូប៊ែរឌី បានថ្លែងប្រាប់អ្នកកាសែត ឲ្យដឹងដែរថា នៅក្នុងជំនួបរវាងរូបលោក ជាមួយនឹងប្រធានគណៈកម្មាធិការជាតិរៀបចំការបោះឆ្នោត គឺបានពិភាក្សាអំពីអនុសាសន៍របស់លោក ដែលបានដាក់ឲ្យ គ.ជ.ប នាពេលកន្លងមក។ គ.ជ.ប បានផ្តល់ការឆ្លើយតបមកឲ្យលោកវិញ ទាក់ទងអនុសាសន៍របស់លោក។

សូមជម្រាបថា លោក សុរិយា ស៊ូប៊ែរឌី អ្នករាយការណ៍ពិសេសរបស់អង្គការសហប្រជាជាតិ អ.ស.ប ទទួលបន្ទុកសិទ្ធិមនុស្ស ប្រចាំកម្ពុជា មកធ្វើបំពេញទស្សនកិច្ចនៅកម្ពុជា ដែលជាបេសកកម្មលើកទី៩ នៅថ្ងៃទី១៩ ដល់ថ្ងៃទី២៥ ខែឧសភា ឆ្នាំ២០១៣។

បេសកកម្មនេះ នឹងផ្ដោតលើការតាមដានអនុសាសន៍ ដែលលោក ស៊ូប៊ែរឌី បានលើកឡើង នៅក្នុងរបាយការណ៍របស់លោក កាលពីលើកមុន ព្រមទាំងកិច្ចពិភាក្សាជាមួយរដ្ឋាភិបាលសង្គមស៊ីវិល និងអ្នកពាក់ព័ន្ធផ្សេងទៀត ដើម្បីជំរុញឲ្យមានការគោរពសិទ្ធិមនុស្សនៅកម្ពុជា។

កិច្ចប្រជុំរវាងលោក អ៊ឹម សួស្តី និងលោក ស៊ូរិយា ប្រាសាទ ស៊ូប៊ែរឌី នៅថ្ងៃទី២១ ខែឧសភា ឆ្នាំ២០១៣ គឺធ្វើឡើងតែមួយថ្ងៃប៉ុណ្ណោះ ក្រោយពីគណបក្សសង្គ្រោះជាតិ ដែលជាគណបក្សប្រឆាំង រួបរួមរវាងគណបក្សសមរង្ស៊ី និងគណបក្សសិទ្ធិមនុស្ស បានធ្វើបាតុកម្ម ដាក់ញត្តិ ទៅកាន់សហភាពអឺរ៉ុប និងលោក ស៊ូរិយា ស៊ូប៊ែរឌី កាលពីព្រឹកថ្ងៃទី២០ឧសភា ឆ្នាំ២០១៣។ ញត្តិនោះ ស្នើឲ្យមានការកែទម្រង់គ.ជ.ប. និងកែសំរួលបញ្ជីឈ្មោះអ្នកបោះឆ្នោត ជាដើម៕ ប្រភព៖ CEN

តើលោក ស៊ូប៊ែឌី មានឥទ្ធិពលលើ គ.ជ.ប ដែរឬទេ?

Posted by RothaDB at 8:27 AM 0 comments

ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក អ៊ឹម សួស្តី បានអនុញ្ញាតឲ្យអ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សកម្ពុជា លោក សុរិយា ស៊ូប៊ែឌី (Surya Prasad Subedi) ជួបពិភាក្សាការងារនៅថ្ងៃទី២១ ខែឧសភា។ ការជួបពិភាក្សានេះ ធ្វើឡើងមួយថ្ងៃបន្ទាប់ពីគណបក្សប្រឆាំងបានដាក់ញត្តិជូនលោក ស៊ូប៊ែឌី ទាមទារឲ្យលោកជួយដាក់សម្ពាធដល់ គ.ជ.ប កែទម្រង់សមាសភាពក្បាលម៉ាស៊ីនដឹកនាំ គ.ជ.ប និងសុំឲ្យអនុវត្តតាមអនុសាសន៍សង្គមស៊ីវិល។

តើលោក ស៊ូប៊ែឌី មានឥទ្ធិពលអាចជំរុញឲ្យ គ.ជ.ប ធ្វើកំណែទម្រង់បានដែរឬទេ?

មន្ត្រី ជាន់ខ្ពស់នៃគណៈកម្មាធិការជាតិរៀបចំការបោះឆ្នោត បញ្ជាក់ថា លោក សុរិយា ស៊ូប៊ែឌី មិនមានឥទ្ធិពល ឬអាចដាក់សម្ពាធមកលើ គ.ជ.ប ឲ្យអនុវត្តនូវអ្វីដែលជាការទាមទាររបស់អង្គការសង្គមស៊ីវិល និងគណបក្សប្រឆាំងបានឡើយ។

គណបក្សប្រឆាំង និងពលរដ្ឋជាង ៥ពាន់នាក់ បានដាក់លិខិតជូនលោក សុរិយា ស៊ូប៊ែឌី កាលពីថ្ងៃទី២០ ខែឧសភា។ ញត្តិនោះបានស្នើឲ្យលោក ស៊ូប៊ែឌី ជួយជំរុញឲ្យ គ.ជ.ប សើរើឡើងវិញនូវបញ្ជីអ្នកបោះឆ្នោតដែលមានភាពមិនប្រក្រតីតាមការរក ឃើញរបស់អង្គការ អ៊ីន.ឌី.អាយ (NDI) របស់សហរដ្ឋអាមេរិក និងរបស់អង្គការឃ្លាំមើលការបោះឆ្នោតក្នុងស្រុក ខុមហ្វ្រែល (Comfrel)។ ញត្តិក៏បានជំរុញឲ្យរដ្ឋាភិបាលអនុញ្ញាតឲ្យលោក សម រង្ស៊ី ប្រធានគណបក្សសង្គ្រោះជាតិ វិលត្រឡប់មកចូលរួមការបោះឆ្នោត ស្នើឲ្យរដ្ឋាភិបាល និងគណបក្សកាន់អំណាច បញ្ឈប់ការប្រើប្រាស់តួនាទី និងមធ្យោបាយផ្សព្វផ្សាយរបស់រដ្ឋ ដើម្បីវាយប្រហារលើគណបក្សប្រជែងជាដើម។

អគ្គលេខាធិការ គ.ជ.ប លោក ទេព នីថា ពន្យល់ថា ការស្នើសុំនោះមិនមានអ្វីប្លែកនោះទេ។ លោកបញ្ជាក់ថា គ.ជ.ប នៅតែបន្តជំហរអនុវត្តតាមច្បាប់ដដែល ហើយថាគណបក្សប្រឆាំង និងអង្គការសង្គមស៊ីវិល មិនអាចយកសម្ពាធពីលោក ស៊ូប៊ែឌី មកដាក់ឲ្យ គ.ជ.ប អនុវត្តនូវអ្វីដែលពួកគេចង់បានឡើយ៖ «ខ្ញុំគ្រាន់តែរំលឹកឡើងវិញ គ.ជ.ប នៅតែរក្សាជំហររបស់ខ្លួនដដែលក្នុងការអនុវត្តតាមច្បាប់។ អ្វីដែលដាក់បន្ទុក ឬដាក់សម្ពាធមកលើ គ.ជ.ប ដែលមិនមែនជាសមត្ថកិច្ច គ.ជ.ប គឺ គ.ជ.ប មិនអាចធ្វើបានទេ ព្រោះត្រូវអនុវត្តតាមច្បាប់»។

ការ ប្រកាន់ជំហរនឹងរបស់ គ.ជ.ប ក្នុងកាលៈទេសៈជិតបោះឆ្នោតនោះត្រូវបាននាយកប្រតិបត្តិគណៈកម្មាធិការ អព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា លោក ហង្ស ពុទ្ធា យល់ថា ការចាប់ផ្ដើមប្រកួតប្រជែង ផ្ដើមដោយការមិនទុកចិត្តគ្នារវាង គ.ជ.ប ជាមួយគណបក្សនយោបាយមុនការបោះឆ្នោត នាំឲ្យមានការច្រានចោលនូវលទ្ធផលនៃការបោះឆ្នោតនាពេលខាងមុខ។ មួយវិញទៀត ម្ចាស់ឆ្នោតអាចនឹងបាត់ជំនឿទៅលើ គ.ជ.ប និងអាចលះបង់សិទ្ធិទៅបោះឆ្នោតបាន៖ «អ្វីដែលបារម្ភនោះត្រង់ថា ការចាប់ផ្ដើមប្រកួតប្រជែងនោះ ផ្ដើមចេញពីការមិនទុកចិត្តគ្នាទៅហើយ អ៊ីចឹងការប្រកាសលទ្ធផលអាចនឹងប្រកាសថាមិនទទួលយក ឬគ្មានន័យស្អីសម្រាប់អ្នកចូលរួមការបោះឆ្នោតនេះ ក៏អាចធ្វើឲ្យសភាពការណ៍តានតឹងអាចនឹងកើតមានឡើង»។

មិនខុស គ្នាដែរ អ្នកវិភាគឯករាជ្យ អ្នកស្រី ជា វណ្ណាត មានមតិថា លទ្ធផលបោះឆ្នោតនាពេលខាងមុខអាចនិយាយបានថា នឹងមានការបដិសេធមិនទទួលស្គាល់ បើទោះបីជាគណបក្សណាមួយជាអ្នកឈ្នះក៏ដោយ។ អ្នកស្រីបញ្ជាក់ថា លោក ស៊ូប៊ែឌី មានឱកាសជួបជាមួយលោកនាយករដ្ឋមន្ត្រី ហ៊ុន សែន ក្នុងបេសកកម្មលើកនេះ ដើម្បីស្នើសុំឲ្យរដ្ឋាភិបាលដែលជាបញ្ជាការរបស់ គ.ជ.ប ឲ្យធ្វើការផ្លាស់ប្ដូរ និងកែទម្រង់ គ.ជ.ប តាមការទទូចសុំពីអង្គការសង្គមស៊ីវិល និងគណបក្សប្រឆាំង៖ «យើងអាចទាយដឹងថា នឹងគ្មានការទទួលស្គាល់ទៅហើយនរណាឈ្នះក៏ដោយ នរណាចាញ់ក៏ដោយ។ ប៉ុន្តែ អ្នកបញ្ជាលើបញ្ជាការនោះ គឺនាយករដ្ឋមន្ត្រី មិនមែន គ.ជ.ប ហ្នឹងអាចដោះដូរបានស្រេចតែចិត្ត។ ត្រង់ថា កែមិនកែស្អីនៅលើប្រមុខរដ្ឋាភិបាល មិនមែននៅត្រឹម គ.ជ.ប ទេ»។

ទោះ យ៉ាងណា មន្ត្រី គ.ជ.ប លោក ទេព នីថា បញ្ជាក់ថា ការទស្សន៍ទាយលទ្ធផលទុកមុន និងការប៉ាន់ថាលទ្ធផលបោះឆ្នោតនោះអាចនឹងត្រូវបដិសេធមិនទទួល ស្គាល់ផ្លូវការនោះ គ្រាន់ជាទស្សនៈបែបនយោបាយប៉ុណ្ណោះ។ លោកពន្យល់ថា គណបក្សទាំងអស់ដែលបានឈរឈ្មោះចូលប្រកួតប្រជែងការបោះឆ្នោតសកលនាខែ កក្កដា ខាងមុខ បានចុះកិច្ចសន្យាជាមុនជាមួយ គ.ជ.ប ថានឹងទទួលយកលទ្ធផលនៃការបោះឆ្នោតនៅពេលដែលការបោះឆ្នោតប្រព្រឹត្ត ទៅសេរី ត្រឹមត្រូវ និងយុត្តិធម៌។

ម្យ៉ាង ការបដិសេធលទ្ធផលបោះឆ្នោតនោះសោត ក៏មិនអាចស្ទះដំណើរការបង្កើតរដ្ឋាភិបាលថ្មីនោះដែរ ប្រសិនបើគណបក្សណាមួយរកសំឡេងអាសនៈសភាបានលើសពី ៥០ បូក ១ នោះ។

អ្នក សិក្សាផ្នែកអភិវឌ្ឍន៍សង្គម លោក កែម ឡី យល់ថា ការដែលរដ្ឋាភិបាល និង គ.ជ.ប មិនទទួលនូវការស្នើសុំរបស់លោក ស៊ូប៊ែឌី ជាការខាតបង់ និងធ្វើឲ្យកម្ពុជា ស្ថិតនៅឯកោពីប្រទេសដែលមានលិខិតបទដ្ឋានក្នុងតំបន់ និងអន្តរជាតិ។ លោក កែម ឡី ពន្យល់ថា អង្គការសហប្រជាជាតិមានតួនាទីសំខាន់ក្នុងការតាមដាន និងត្រួតពិនិត្យអនុវត្តកិច្ចការសិទ្ធិមនុស្ស លទ្ធិប្រជាធិបតេយ្យ និងការបោះឆ្នោតជាដើម។

លោក កែម ឡី៖ «វាមិនជាបញ្ហាទេ ប្រទេសយើងមានឯករាជ្យភាព ប៉ុន្តែតម្លៃរបស់វាយើងចង់បានតម្លៃឲ្យប្រទេសយើងខិតមកប្រទេសឯកោ ឬក៏តម្លៃរបស់យើងស្ថិតក្នុងប្រទេសគោរពនូវលិខិតបទដ្ឋានគតិយុត្តិ ជាលក្ខណៈតំបន់ ឬលក្ខណៈអន្តរជាតិ។ ឧទាហរណ៍ ដូចជាយើងព្រមយកអ្នករាយការណ៍ពិសេសរបស់អង្គការសហប្រជាជាតិ យើងត្រូវតែគោរពអនុសាសន៍របស់គេ បើទោះបីជាអនុសាសន៍នោះល្អ ឬមិនល្អក៏ដោយ ក៏យើងយកមកសិក្សា ហើយត្រូវយកមកកែប្រែ»។

ដំណើរ បេសកកម្មលើកទី៩ រយៈពេល ១សប្ដាហ៍នៅកម្ពុជា របស់អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី នឹងស្វែងយល់ពីភាពរីកចម្រើនក្នុងការអនុវត្តអនុសាសន៍ទាំងឡាយ ពាក់ព័ន្ធនឹងប្រព័ន្ធតុលាការ កំណែទម្រង់សភា កំណែប្រព័ន្ធបោះឆ្នោត និងសម្បទានដីសេដ្ឋកិច្ច ដែលលោកបានធ្វើបន្ទាប់ពីបេសកកម្មកាលពីខែធ្នូ ឆ្នាំ២០១២។ បេសកកម្មរបស់លោកលើកនេះ អង្គការសង្គមស៊ីវិល និងគណបក្សប្រឆាំង រំពឹងទុកថា នឹងអាចជួយបង្កើនបរិយាកាសងាយស្រួលសម្រាប់ការបោះឆ្នោតដោយសេរី និងយុត្តិធម៌នាខែកក្កដា ខាងមុខ។

អង្គការឃ្លាំមើលការ បោះឆ្នោតនៅកម្ពុជា យល់ថា បើទោះជា គ.ជ.ប មិនអនុវត្តតាមអនុសាសន៍របស់អង្គការសង្គមស៊ីវិល ឬអនុសាសន៍របស់លោក សុរិយា ស៊ូប៊ែឌី ក៏ដោយ ក៏ចំណុចមួយដែល គ.ជ.ប អាចធ្វើទៅបានដើម្បីឲ្យមានការសុខចិត្តទាំងអស់គ្នានោះ គឺការបង្កើតនូវគណៈកម្មការជ្រើសរើសគណៈកម្មការឃុំសង្កាត់រៀបចំការ បោះឆ្នោត និងមន្ត្រីការិយាល័យរៀបចំការបោះឆ្នោត។ ការបង្កើតគណៈកម្មការជ្រើសរើសនោះ អាចធ្វើទាន់ពេលវេលា និងមិនខុសច្បាប់នោះទេ។ ម្យ៉ាង អាចលាងជម្រះការចោទប្រកាន់មួយចំនួនដែលលើកឡើងថា គ.ជ.ប តែងជ្រើសរើសមន្ត្រីបោះឆ្នោតតែបក្ខពួករបស់ខ្លួន និងនាំឲ្យខ្វះទំនុកចិត្តពីគណបក្សដទៃ ចំពោះការជឿជាក់ថាមន្ត្រីទាំងនោះអាចអនុវត្តន៍ជាអាជ្ញាកណ្ដាល ក្នុងការបោះឆ្នោតបានដែរ ឬយ៉ាងណា៕ ប្រភព៖ RFA

លោក ស៊ូប៊ែឌី ជួប គ.ជ.ប លើកឡើងពីបញ្ហាបោះឆ្នោតជាតិ នៅខែកក្កដា

Posted by RothaDB at 8:25 AM 0 comments

នៅព្រឹកថ្ងៃអង្គារ ទី២១ឧសភានេះ លោក ស៊ូរិយា ស៊ូប៊ែឌី អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា បានជួបជាមួយថ្នាក់ដឹកនាំគណៈកម្មាធិការជាតិរៀបចំការបោះឆ្នោត គ.ជ.ប.។ លោក អ៊ឹម សួស្តី ប្រធាន គ.ជ.ប. បានចាត់ទុកកិច្ចប្រជុំជាង ២ ម៉ោងនៅព្រឹកមិញ ថាជាឱកាសល្អ ដែលគ.ជ.ប. បានពន្យល់ដល់លោក ស៊ូប៊ែឌី អំពីកង្វល់ ដែលអ្នករាយការណ៍ពិសេស បានឃើញ និងបានឮ ពាក់ព័ន្ធនឹងការបោះឆ្នោតជាតិ នៅខែកក្កដាខាងមុខ ដូចជា បញ្ហាបញ្ជីឈ្មោះអ្នកបោះឆ្នោត និងការជ្រើសរើសមន្ត្រីរៀបចំការបោះឆ្នោត ជាដើម។ ប៉ុន្តែលោក អ៊ឹម សួស្តី បានអះអាងថា អវត្តមានរបស់លោក សមរង្ស៊ី សម្រាប់ការបោះឆ្នោតជាតិ នាខែកក្កដាខាងមុខ មិនត្រូវបានអ្នករាយការណ៍ពិសេសលើកឡើងទេ។ កិច្ចប្រជុំរវាងលោក អ៊ឹម សួស្តី ប្រធានគ.ជ.ប. និងលោក ស៊ូរិយា ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា នៅព្រឹកថ្ងៃទី២១ ខែឧសភា ឆ្នាំ២០១៣ គឺធ្វើឡើងតែមួយថ្ងៃប៉ុណ្ណោះ ក្រោយពីគណបក្សសង្គ្រោះជាតិ ដែលជាគណបក្សប្រឆាំង រួបរួមរវាងគណបក្សសមរង្ស៊ី និងគណបក្សសិទ្ធិមនុស្ស បានធ្វើបាតុកម្ម ដាក់ញត្តិ ទៅកាន់សហភាពអឺរ៉ុប និងដាក់ជូនលោក ស៊ូរិយា ស៊ូប៊ែឌី កាលពីព្រឹកថ្ងៃទី២០ឧសភា ឆ្នាំ២០១៣។ ញត្តិរបស់បក្សប្រឆាំង បានស្នើឲ្យមានការកែទម្រង់គ.ជ.ប. និងកែសំរួលបញ្ជីឈ្មោះអ្នកបោះឆ្នោត ជាដើម

បន្ទាប់ពី កិច្ចប្រជុំ នៅគ.ជ.ប. នាព្រឹកមិញ លោក អ៊ឹម សួស្តី ប្រធាន គ.ជ.ប. បានប្រាប់ក្រុមអ្នកកាសែតថា លោកស៊ូប៊ែឌី បានលើកឡើងពីកង្វល់ ដែលគាត់បានឃើញ និងគាត់បានឮ តាមរយៈដែលគេប្រាប់គាត់។ គ.ជ.ប. ក៏បានបកស្រាយទៅវិញពីកង្វល់នោះ នូវអ្វីដែលគ.ជ.ប. អាចធ្វើបានតាមផ្លូវច្បាប់ និងអ្វីដែលលំបាកតាមផ្លូវច្បាប់ ព្រមទាំងផ្លូវបច្ចេកទេស។ កង្វល់របស់លោកស៊ូប៊ែឌី ជុំវិញការបោះឆ្នោតនៅខែកក្កដាខាងមុខ ត្រូវបានលោក អ៊ឹម សួស្តី លើកឡើងថា ជុំវិញបញ្ជីឈ្មោះអ្នកបោះឆ្នោត ការប្រើប្រាស់មធ្យោបាយរដ្ឋ និងជុំវិញការជ្រើសរើសមន្ត្រីរៀបចំការបោះឆ្នោត ដែលជាបញ្ហាដដែលៗ។

លោក អ៊ឹម សួស្តី បានចាត់ទុកកិច្ចប្រជុំរវាងរូបលោក និងលោក ស៊ូប៊ែឌី នៅព្រឹកមិញ ថាជាឱកាសល្អ ដែលគ.ជ.ប.បានពន្យល់លោក ស៊ូប៊ែឌី អំពីសភាពការណ៍ស្រុកខ្មែរ និងអំពីច្បាប់ស្រុកខ្មែរ ព្រមទាំងបទពិសោធន៍ ដែលគ.ជ.ប. ធ្លាប់ធ្វើកន្លងមក។ លោកប្រធាន គ.ជ.ប បានលើកឡើងទៀតថា នៅក្នុងជំនួបនោះ គ.ជ.ប បើកចំហថា អ្នកណាដែលចង់ដឹង គ.ជ.ប.នឹងប្រាប់។ ការជួបគ្នា រវាងរូបលោក នឹងលោក ស៊ូប៊ែឌី គឺជាឱកាសមួយ ដែល គ.ជ.ប ចង់ប្រាប់ដល់គាត់ថា អ្វីដែល គ.ជ.ប បានធ្វើ និងកំពុងធ្វើ ហើយការលំបាក ដែល គ.ជ.ប បានជួបប្រទះ។

យ៉ាងណាក៏ដោយ លោក អ៊ឹម សួស្តី បានលើកឡើងថា លោក ស៊ូប៊ែឌី មិនបានលើកឡើងពីអវត្តមានរបស់លោក សមរង្ស៊ី សម្រាប់ការបោះឆ្នោតជាតិ នៅខែកក្កដាខាងមុខឡើយ។ ចំណែកអ្នករាយការណ៍ពិសេស លោក ស៊ូប៊ែឌី បានប្រាប់អ្នកកាសែតនៅគ.ជ.ប. នាព្រឹកមិញថា លោក និងប្រធានគ.ជ.ប. បានពិភាក្សាអំពីអនុសាសន៍របស់លោក ដែលបានដាក់ឲ្យ គ.ជ.ប នាពេលកន្លងមក ជុំវិញកំណែទម្រង់ដំណើរការបោះឆ្នោតនៅកម្ពុជា។ លោកស៊ូប៊ែឌី ដែលមកបំពេញបេសកកម្ម នៅកម្ពុជា ចាប់ពីថ្ងៃទី១៩ ដល់ថ្ងៃទី២៥ ខែឧសភា ក៏បានអះអាងថា លោកនៅតែបារម្ភពីនីតិវិធីរៀបចំការបោះឆ្នោត នាពេលខាងមុខ រួមទាំងការបាត់ឈ្មោះអ្នកបោះឆ្នោត ដូចអ្វីដែលសង្គមស៊ីវិល និងបក្សប្រឆាំង បានលើកឡើង ជាដើម៕ ប្រភព៖ RFI