លោក Fong Ngai អគ្គនាយកការិយាល័យសេដ្ឋកិច្ចនិងពាណិជ្ជកម្មហុងកុង ដែលមានការិយាល័យនៅក្នុងប្រទេសសិង្ហបុរីបានប្រាប់ភ្នំពេញប៉ុស្តិ៍ កាលពីម្សិលមិញថា ស្ថានភាពនៃទំនាក់ទំនងរវាងប្រទេសកម្ពុជានិងទីក្រុងហុងកុងកំពុងតែ បន្តនៅក្នុងស្ថានភាពល្អឡើងជាលំដាប់ហើយទំនាក់ទំនងផ្នែក ពាណិជ្ជកម្មក៏នៅបន្តមានកំណើនគួរឲ្យកត់សម្គាល់ពីមួយឆ្នាំទៅមួយ ឆ្នាំ។
លោកបានឲ្យដឹងថា៖ «យើងសង្កេតឃើញថាទំនាក់ទំនងផ្នែកពាណិជ្ជកម្មរវាងកម្ពុជានិង ហុងកុងមានកំណើនជារៀងរាល់ឆ្នាំក្នុងអត្រាកំណើនជាមធ្យម៩ ភាគរយគិតចាប់ពីឆ្នាំ២០០៨ រហូតដល់ឆ្នាំ២០១២»។
លោកបានបន្ថែមទៀតថាការប្រកាសរបស់ហុងកុងក្នុងការលើកលែង ទិដ្ឋាការដល់អ្នកកាន់លិខិតឆ្លងដែនផ្លូវការ និងការទូត ពីកម្ពុជាក៏ជាការវិវឌ្ឍថ្មីមួយទៀតដើម្បីពង្រឹងទំនាក់ទំនងរវាង ហុងកុង និង កម្ពុជាឲ្យបានកាន់តែល្អជាងមុន។លោកបានបន្តថា ទីក្រុងហុងកុង គឺជាដៃគូពាណិជ្ជកម្មនិងជាទីផ្សារធំជាងគេទី៦ សម្រាប់លក់ផលិតផលរបស់ប្រទេសកម្ពុជា។លើសពីនេះ ក្នុងចំណោមប្រទេសធំៗដែលកម្ពុជាបាននាំចូលផលិតផលដើម្បីប្រើប្រាស់ និងសម្រាប់ទ្រទ្រង់កំណើនខាងវិស័យកម្មន្តសាលហុងកុងក៏ជាប្រទេសធំ ជាងគេទីប្រាំដែលកម្ពុជាបានទិញទំនិញ។
គិតមកត្រឹមដំណាច់ឆ្នាំ២០១២ក្រុមហ៊ុនហុងកុងប្រមាណ៥៦ ក្រុមហ៊ុនបានកំពុងវិនិយោគនៅកម្ពុជាលើរោងចក្រកាត់ដេរ និង វាយនភ័ណ្ឌហើយក្រុមហ៊ុនទាំងនោះបានផ្តល់ការងារប្រមាណជា៣៥ ០០០ កន្លែងដល់ប្រជាជនកម្ពុជា។
ទិន្នន័យពាណិជ្ជកម្មពីការិយាល័យសេដ្ឋកិច្ចនិងពាណិជ្ជកម្មហុងកុង បានបង្ហាញថា ទំហំពាណិជ្ជកម្មទ្វេភាគីរវាងកម្ពុជានិង ហុងកុងសម្រេចបាន៨៧៩ លានដុល្លារកាលពីឆ្នាំមុន ដែលមានការកើនឡើងប្រមាណ១៨ ភាគរយប្រៀបធៀបនឹងឆ្នាំ២០១១។
ក្នុងនោះផលិតផលដែលកម្ពុជាបាននាំចេញទៅហុងកុងមានដូចជា ផលិតផលកាត់ដេរនិង វាយនភ័ណ្ឌ ដែលតំណាងប្រមាណ៨០ ភាគរយនៃការនាំចេញសរុប។ ផលិតផលបន្ទាប់បន្សំដែលបាននាំចេញមានដូចជាអង្ករ ថ្នាំជក់ និងផលិតផលមួយចំនួនទៀត។
ចំណែកផលិតផលនាំចូលដែលកម្ពុជាទិញពីហុងកុង មានដូចជា គ្រឿងម៉ាស៊ីនផលិតផលបង្គុំសម្រាប់គ្រឿងម៉ាស៊ីន គ្រឿងអលង្ការ គ្រឿងអេឡិចត្រូនិក ជាដើម។គួររំឭកថា គិតចាប់ពីថ្ងៃទី១ ខែ មិថុនាឆ្នាំនេះតទៅហុងកុងបានយល់ព្រមជាឯកតោភាគីក្នុងការលើកលែង ទិដ្ឋាការចំពោះអ្នកកាន់លិខិតឆ្លងដែនផ្លូវការ និងការទូត ពីកម្ពុជាគិតចាប់ពីដើមខែមិថុនាតទៅដើម្បីឲ្យមន្រ្តីនិង អ្នកការទូតពីកម្ពុជាអាចចេញចូលទីក្រុងពាណិជ្ជកម្មមួយនេះកាន់តែ ងាយស្រួលជាងមុន។
លោក កុយ គួង អ្នកនាំពាក្យក្រសួងការបរទេសកម្ពុជាបានឲ្យដឹងថា៖«ការលើកលែង ទិដ្ឋាការនេះនឹងរួមចំណែកធ្វើឲ្យការពង្រឹងកិច្ចសហការផ្នែក អភិវឌ្ឍន៍ និង សេដ្ឋកិច្ចរវាងកម្ពុជានិងហុងកុងកាន់តែមានភាពងាយស្រួល»។
លោក ហូ វណ្ឌី សហប្រធានក្រុមការងារឯកជនវិស័យទេសចរណ៍បានប្រាប់ភ្នំពេញប៉ុស្តិ៍កាល ពីសប្តាហ៍មុនថារហូតមកទល់ពេលនេះចំនួនភ្ញៀវទេសចរពីទីក្រុង ហុងកុងមកទស្សនាកម្ពុជាមានចំនួនតិចតួចនៅឡើយ។តែសម្រាប់ប្រជាជន កម្ពុជាពិសេសគ្រួសារមានចំណូលខ្ពស់ទីក្រុងហុងកុងជាគោលដៅទេសចរណ៍ ដ៏មានប្រជាប្រិយភាពមួយដែលពួកគេប្រាថ្នាចង់ទស្សនា ពិសេសពេលបុណ្យជាតិធំៗដែលមានការឈប់សម្រាករយៈពេលយូរ។
លោកអះអាងថា ការលើកលែងលិខិតឆ្លងដែនផ្លូវការ និងការទូត នាពេលនេះជាការវិវឌ្ឍក្នុងជំហានបឋមមួយដើម្បីឈានដល់អនុញ្ញាតឲ្យ ពលរដ្ឋកម្ពុជាទូទៅដែលកាន់លិខិតឆ្លងដែនធម្មតាអាចចេញចូល និង ស្នាក់នៅក្នុងទីក្រុងហុងកុងកាន់តែងាយស្រួល។លោកបន្តថា៖«ពេល អ្នកទេសចរមានមធ្យោបាយងាយស្រួលជាងមុនក្នុងការចេញចូលទស្សនាប្រទេស ណាមួយគេនឹងអាចសម្លឹងឃើញឱកាសវិនិយោគ»៕
http://postkhmer.com/index.php/business/business/99486-2013-06-18-05-05-30
Facebook
No comments:
Post a Comment