លោកស្រី ងួនសុខាអគ្គនាយកធនាគារជាតិនៃកម្ពុជាបានប្រាប់ភ្នំពេញប៉ុស្ដិ៍កាល ពីម្សិលមិញថាទោះជាកម្ពុជាអាចទទួលបានប្រយោជន៍ពីវិធានការជំរុញ សេដ្ឋកិច្ចរបស់ធនាគារកណ្ដាលអាមេរិកដែលបានចាប់ផ្ដើមកាលពីឆ្នាំ ២០០៨ ដើម្បីឆ្លើយតបទៅនឹងវិបត្តិហិរញ្ញវត្ថុពិភពលោកក្តី ក៏ការកាត់បន្ធូរបន្ថយវិធានការនេះដែលគេរំពឹងថានឹងកើតមាននោះ នឹងបង្កផលប៉ះពាល់តិចតួចដោយសារតែផ្សារភាគហ៊ុនរបស់កម្ពុជាស្ថិត ក្នុងដំណាក់កាលចាប់ផ្តើម ការគ្មានទីផ្សារមូលបត្របំណុលនិងលក្ខខណ្ឌអំណោយផលសម្រាប់ការវិនិយោគ បរទេស។
លោកស្រីបានលើកឡើងថា៖ «សម្រាប់កម្ពុជាយើងមានបរិស្ថានខុសគេបើធៀបនឹងប្រទេសផ្សេងទៀតនៅអាស៊ី»។
ទីផ្សារភាគហ៊ុនអាស៊ីធ្លាក់ចុះយ៉ាងខ្លាំងកាលពីថ្ងៃចន្ទដោយ បន្តការធ្លាក់ចុះពីសប្ដាហ៍មុនបន្ទាប់ពីធនាគារកណ្ដាលអាមេរិកបាន ឲ្យដឹងថាខ្លួននឹងកាត់បន្ថយកម្មវិធីជំរុញសេដ្ឋកិច្ចរបស់ខ្លួន ក្នុងពេលណាមួយនៅឆ្នាំនេះ។
លោកស្រីបានបន្តថា៖ «បញ្ហាសំខាន់គឺថាទីផ្សារមូលធនរបស់យើងគឺទើបតែកើតមានយើងមិនមាន ទីផ្សារមូលបត្រឬទីផ្សារបំណុលសមរម្យនៅឡើយទេ»។
លោកស្រីបញ្ជាក់ថា៖ «នោះមានន័យថាមូលធនដែលចូលមកគឺភាគច្រើនក្នុងរូបភាពជាការ វិនិយោគផ្ទាល់ពីបរទេសដែលមានរយៈពេលវែង និងមិនមែនជាការវិនិយោគបែបកេងចំណេញនោះទេ(ឬលំហូរមូលធនរយៈពេលខ្លី )»។លោកស្រីបន្ថែមថាប្រទេសផ្សេងទៀតនៅក្នុងតំបន់ដែលមានទីផ្សារ រយៈពេលខ្លីគឺ ងាយរងគ្រោះដោយសារតែមូលធនអាចហូរចូលឬហូរចេញយ៉ាងរហ័សពីទីផ្សារ ប្រទេសទាំងនោះ។
លោកស្រី សុខា បានថ្លែងថា បរិយាកាសសេដ្ឋកិច្ចប្រកបដោយការស្វាគមន៍របស់កម្ពុជាក៏នឹងជួយកាត់ បន្ថយផលប៉ះពាល់ពីការធ្លាក់ចុះដែលអាចកើតមាននៃការវិនិយោគផ្ទាល់ ពីបរទេសដោយសារកង្វះខាតសាច់ប្រាក់ងាយស្រួលនៅសកលលោកផងដែរ។
លោកស្រីបានបន្តថា៖ «ប្រសិនបើសេដ្ឋកិច្ចកម្ពុជាមានចក្ខុវិស័យនិងស្ថិរភាពសេដ្ឋកិច្ចល្អ ខ្លាំង និងមានឱកាសលូតលាស់នោះ វិនិយោគិននឹងចូលមក»។
លោកស្រីបានបន្តថា៖ «ទាក់ទងនឹងការប្រកួតប្រជែងសម្រាប់ការវិនិយោគផ្ទាល់ពីបរទេស យើងត្រូវតែសម្លឹងមើលថាតើកម្ពុជាមានលក្ខខណ្ឌអំណោយផលសម្រាប់ ទាក់ទាញវិនិយោគិនហើយឬនៅបើធៀបនឹងមីយ៉ាន់ម៉ា និងវៀតណាម។ ក្របខ័ណ្ឌច្បាប់របស់យើង ហេដ្ឋារចនាសម្ព័ន្ធ រដ្ឋបាល ល្អគ្រប់គ្រាន់សម្រាប់វិនិយោគិនបរទេសដែលមានចំណាប់អារម្មណ៍វិនិយោគ រយៈពេលវែងនៅក្នុងប្រទេសរបស់យើង។ នោះគឺជាអ្វីដែលខុសគ្នារវាងវិនិយោគិនផ្ទាល់ពីបរទេស និងវិយោគិនរយៈពេលខ្លី»។
នៅពេលសួរទាក់ទងនឹងសម្ពាធរូបិយប័ណ្ណ លោកស្រី សុខា រំពឹងថា អ្វីៗនឹងនៅតែមានស្ថិរភាព ប្រសិនបើតម្រូវការប្រាក់ដុល្លារអាមេរិកកើនឡើង។
លោកស្រីបានថ្លែងថា៖ «សេដ្ឋកិច្ចរបស់យើងប្រើប្រាស់ប្រាក់ដុល្លារ ដែលមានន័យថា យើងមិនចាំបាច់ប្តូរប្រាក់ដុល្លារនោះទេ។ ប្រសិនបើប្រទេសផ្សេងទៀតត្រូវប្តូរប្រាក់ដុល្លារនោះ ប្រទេសទាំងនោះត្រូវតែស្រូបយកលំហូរចូលមូលធនតាមរយៈការចាក់បញ្ចូល រូបិយប័ណ្ណក្នុងស្រុក»។
លោក កង ច័ន្ទតារារ័ត្ន ប្រធានវិទ្យាស្ថានកម្ពុជាដើម្បីការសិក្សាអភិវឌ្ឍន៍ មានការប្រុងប្រយ័ត្នខ្លាំងក្នុងការវាយតម្លៃរបស់លោកលើការ កាត់បន្ថយការចាក់បញ្ចូលសាច់ប្រាក់នៅសហរដ្ឋអាមេរិក។
លោកបានមានប្រសាសន៍ថា៖ «ការរឹតបន្តឹងបរិមាណប្រាក់ដុល្លារនឹងបង្កផលប៉ះពាល់ដោយផ្ទាល់មក លើកំណើនសេដ្ឋកិច្ចកម្ពុជា។ យើងនឹងប្រឈមការប្រកួតប្រជែងខ្លាំងក្នុងការទាក់ទាញវិនិយោគិនផ្ទាល់ ពីបរទេស»៕ PB Postkhmer.com
Facebook
No comments:
Post a Comment