រដ្ឋាភិបាលកម្ពុជា រិះគន់របាយការណ៍ទម្លាក់ថ្នាក់កម្ពុជាពីការជួញដូរមនុស្ស

Wednesday, June 26, 2013

រដ្ឋាភិបាលកម្ពុជា រិះគន់របាយការណ៍ទម្លាក់ថ្នាក់កម្ពុជាពីការជួញដូរមនុស្ស

Posted by RothaDB at 8:14 AM 0 comments

ភ្នំពេញៈ រដ្ឋាភិបាលកម្ពុជា បានធ្វើការរិះគន់របាយការណ៍របស់ក្រសួងការបរទេសអាមេរិកដែលបាន ទិតៀនយ៉ាងចាស់ដៃចំពោះកិច្ចប្រឹងប្រែងរបស់ខ្លួនដើម្បីទប់ស្កាត់ ការជួញដូរមនុស្ស ដោយអះអាងថា របាយការណ៍នោះពោរពេញទៅដោយព័ត៌មានមិនត្រឹមត្រូវ និងការវាយតម្លៃដោយស្រពេចស្រពិល។

របាយការណ៍ស្តីពីការជួញដូរមនុស្ស (TIP) របស់ក្រសួងការបរទេសអាមេរិកត្រូវបានចេញផ្សាយកាលពីថ្ងៃសុក្រ សប្តាហ៍មុន ដោយបញ្ចុះចំណាត់ថ្នាក់កម្ពុជាជាលើកដំបូងចាប់តាំងពីឆ្នាំ២០០៩ ដល់កម្រិតមួយសម្រាប់ប្រទេសដែលមិនអាចផ្តល់ភ័ស្តុតាងគ្រប់គ្រាន់ ហើយថា ជាងនេះទៅទៀតពួកគេកំពុងតែព្យាយាមបំពេញតាមស្តង់ដារប្រឆាំងនឹង ការជួញដូរមនុស្សក្នុងកម្រិតអប្បបរមា។

ក្នុងសេចក្តីថ្លែងការណ៍មួយដែលចេញ ផ្សាយកាលពីថ្ងៃម្សិលមិញដោយ ក្រសួងការបរទេស និងសហប្រតិបត្តិការអន្តរជាតិ របស់រាជរដ្ឋាភិបាលកម្ពុជា បានលើកឡើងថា របាយការណ៍នោះ ភាគច្រើនធ្វើមិនដឹងមិនឮចំពោះកិច្ចប្រឹងប្រែងរបស់កម្ពុជាក្នុង ការប្រយុទ្ធប្រឆាំងការជួញដូរមនុស្ស ហើយបានចាត់ទុកផ្នែកខ្លះនៃរបាយការណ៍នេះថា«គួរឲ្យអស់សំណើច»។

សេចក្តីថ្លែងការណ៍ក្រសួងការបរទេស កម្ពុជានេះបានបន្តថា៖«ភាគ ច្រើននៃបញ្ហាដែលគេបានលើកឡើងក្នុងរបាយការណ៍នេះ បានធ្វើឡើងតាមការសន្និដ្ឋានជាទូទៅ ឬមិនមានព័ត៌មានពិតប្រាកដ»។

សេចក្តីថ្លែងការណ៍ដដែល បានលើកឡើងថា ប៉ុន្មានឆ្នាំថ្មីៗនេះកម្ពុជាបានជំរុញច្បាប់មួយចំនួនដែលគេធ្វើ ឡើងក្នុងបំណងបង្ក្រាបការជួញដូរដែលរបាយការណ៍នេះ«មានចេតនា»ធ្វើ មិនដឹងមិនឮដើម្បីរិះគន់លើចន្លោះប្រហោងនៃដំណើរវិវត្តន៍របស់ ប្រទេសកម្ពុជា។

របាយការណ៍ TIP បានវិនិច្ឆ័យជាពិសេសលើឆន្ទៈនិងកិច្ចប្រឹងប្រែងរបស់រដ្ឋាភិបាល ក្នុងការដោះស្រាយបញ្ហាការជួញដូរមនុស្សជាជាងទំហំនៃបញ្ហារបស់ ប្រទេសនេះ។

របាយការណ៍ក្រសួងការបរទេសអាមេរិកកាល ពីសប្តាហ៍មុន បានរិះគន់រដ្ឋាភិបាលកម្ពុជាលើអំពើពុករលួយ«ជាទូទៅ»ដែលវា បានធ្វើឲ្យរាំងស្ទះដល់ការផ្តន្ទាទោស និងកិច្ចប្រឹងប្រែងដើម្បីនាំអ្នកជួញដូរមកផ្តន្ទាទោស។

ប៉ុន្តែសេចក្តីថ្លែងការណ៍របស់ក្រសួង ការបរទេសកម្ពុជា កាលពីម្សិលមិញ បានអះអាងថា៖« ដំណើរការវិត្តន៍ពិតប្រាកដ»កាលពីឆ្នាំ២០១២ ដោយជនសង្ស័យ១៣៣នាក់ ត្រូវបានចាប់ខ្លួន ជនរងគ្រោះ៤៥៨នាក់ ត្រូវបានគេជួយសង្គ្រោះ ហើយ៣០០នាក់ ត្រូវខាងតុលាការធ្វើការជំនុំជម្រះទោស។

ចំនួនទាំងនោះ ផ្ទុយគ្នាស្រឡះពីរបាយការណ៍ ដែលថា មានតែអ្នកជួញដូរ៥០នាក់ត្រូវបានតុលាការផ្តន្ទាទោសក្នុងរយៈពេលនៃ ការរាយការណ៍នេះ ដោយបណ្តាលឲ្យមានការផ្តន្ទាទោសមនុស្ស ៤៤ នាក់គត់ នៅចន្លោះថ្ងៃទី១ ខែមេសា ឆ្នាំ២០១២ដល់ថ្ងៃទី៣១ ខែមីនា ឆ្នាំ២០១៣៕ ប្រភពព័ត៌មាន ៖ ភ្នំពេញប៉ុស្តិ៍

Wednesday, June 26, 2013