សៀវភៅ​ថ្មី​អំពី​ជីវប្រវត្ដិ​របស់​លោក​ហ៊ុន សែន "បុរស​ខ្លាំង៖ ជីវិត​អស្ចារ្យ​របស់​លោក​ ហ៊ុន សែន ពី​ក្មេង​វត្ដ​ទៅ​ជា​នាយក​រដ្ឋមន្រ្ដី​នៃ​ប្រទេស​កម្ពុជា"

នៅ​ល្ងាច​ថ្ងៃ​អង្គារ​ ទី​២៥ ខែ​មិថុនា​នេះ នៅ​ប្រទេស​ថៃ​នឹង​មាន​ការ​ប្រកាស​ឲ្យ​ប្រើ​ប្រាស់​នូវ​សៀវ​ភៅ​ថ្មី​មួយ​អំពី ​ជីវ​ប្រវត្ដិ​របស់​លោក​នាយក​រដ្ឋមន្រ្ដី​ ហ៊ុន សែន និង​ក្រុម​គ្រួសារ​លោក​។

ចំណង​ជើង​នៃ​សៀវភៅ​នេះ មាន​ឈ្មោះ​ជា​ភាសា​អង់គ្លេស​ថា “Strongman: The extraordinary life o Hun Sen from pagoda boy to the Prime Minister of Cambdia” ដែល​ប្រែ​ជា​ភាសា​ខ្មែរ​ថា "បុរស​ជើង​ខ្លាំង៖ ជីវិត​អស្ចារ្យ​របស់​លោក​ ហ៊ុន សែន ពី​ក្មេង​វត្ដ​ទៅ​ជា​នាយក​រដ្ឋមន្រ្ដី​នៃ​ប្រទេស​កម្ពុជា"។

នៅ​ក្នុង​ ព័ត៌មាន​ដែល​វិទ្យុ​អូស្រ្ដាលី​ទទួល​បាន​ថ្ងៃ​នេះ សហនិពន្ធ​ឯក​រាជ្យ​លោក Harish Mehta ដែល​ជា​បណ្ឌិត​ផ្នែក​ប្រវត្ដិ​សាស្រ្ដ និង​អ្នក​ស្រី Julia Mehta បណ្ឌិត​ផ្នែក​អក្សរសាស្រ្ដ​អង់គ្លេស និង​ការ​សិក្សា​អំពី​អាស៊ី​ខាង​ត្បូង​បាន​ឲ្យ​ដឹង​ថា សៀវ​ភៅ​ថ្មី​នេះ មាន​បន្ថែម​៦​ជំពូក​ ដោយ​មាន​ការ​សម្ភាសន៍​ថ្មីៗ​ពី​សំណាក់​លោក​ ហ៊ុន សែន, លោក​ស្រី ប៊ុន រ៉ានី​ហ៊ុន សែន និង​កូន​ប្រុស​លោក ហ៊ុន ម៉ាណែត។ សៀវភៅ​នេះ ក៏​ប្រើ​ឯក​សារ​សម្ងាត់​របស់ CIA មួយ​ចំនួន​ដែរ ដែល​បាន​បញ្ចេញ​ឲ្យ​ដឹង​ពី​ក្រសួង​ការ​បរទេស​អាម៉េរិក និង​ឯក​សារ​ប្រធានាធិបតី​អាម៉េរិក​មួយ​ចំនួន​ទៀត។
អ្នក​និពន្ធ​ក៏​បាន ​លើក​ឡើង​ដែរ​ថា លោក​អតីត​ប្រធានាធិបតី​បារាំង​ Francois Mitterrand ធ្លាប់​បាន​សរសើរ​លោក​ ហ៊ុន​ សែន អំពី​អភិបាល​កិច្ច​ល្អ និង​ក្នុង​ការ​ផ្ដល់​សិ្ថរភាព​នយោបាយ​ទប់​ស្កាត់​ការ​វិល​ត្រឡប់​មក​វិញ​នៃ​ របប​ខ្មែរ​ក្រហម។
តាម​ការ​ឲ្យ​ដឹង​អំពី​ចំណុច​សំខាន់ៗ​នៅ​ក្នុង​សៀវភៅ ​ថ្មី​នេះ ក៏​មាន​ការ​លើក​ឡើង​ផង​ដែរ​អំពី​ឯក​សារ​សម្ងាត់​មួយ​របស់​លោក​ ហ៊ុន សែន នៅ​ក្នុង​ឆ្នាំ​២០០១ ដែល​សរសេរ​អំពី​ជំហាន​សំខាន់ៗ​ដែល​លោក​ត្រូវ​ធ្វើ ដើម្បី​គ្រប់​គ្រង​ដំណើរ​ការ​គ្រង​រាជ​នៃ​រាជ​វង្សា​នុវង្ស​ខ្មែរ​ នៅ​ក្នុង​ព្រឹត្ដិការណ៍​ដែល​សម្ដេច​នរោត្ដម​សីហនុ​ព្រះ​អង្គ​សោយ​ទិវង្គត។
នេះគឺ ​ជា​សៀវ​ភៅ​លើក​ទី​២​ហើយ​របស់​សហនិពន្ធ​ទាំង​ពីរ​ដែល​សរសេរ​អំពី​ ជីវប្រវត្ដិ​របស់​លោក​នាយក​រដ្ឋ​មន្រ្ដី​ ហ៊ុន សែន។ ​​សៀវ​ភៅ​ចុង​ក្រោយ​នេះ ក៏​លើក​ឡើង​ផង​ដែរ​អំពី​តួនាទី​របស់​លោក​ស្រី ប៊ុន​ រ៉ានី​ហ៊ុន សែន និង​លោក​ ហ៊ុន ម៉ាណែត​ ក្នុង​ការ​ស្ថាបនាជាតិ។ មិន​តែ​ប៉ុណ្ណោះ​ សៀវភៅ​នេះ ក៏​មាន​ការ​បក​ស្រាយ​អំពី​ជំហាន​សំខាន់ៗ​ផង​ដែរ​ដែល​លោក​ ហ៊ុន សែន​ បាន​ប្រើ​ក្នុង​ការ​បង្កើត​វង្ស​ត្រកូល​ថ្មី​នៃ​គ្រួសារ​ហ៊ុន៕ ប្រភពព័ត៌មាន ៖ Radio Australia