Thursday, August 22, 2013
ក្រសួងសុខាភិបាល និងអង្គការ WHO៖ ជំងឺផ្តាសាយបក្សី កើតឡើងលើកុមារា អាយុ ៦ឆ្នាំ ម្នាក់ទៀត នៅខេត្តកណ្តាល
ប្រភព CEN : ភ្នំពេញ: ក្រសួងសុខាភិបាល និងអង្គការសុខភាពពិភពលោក WHO បានប្រកាសព័ត៌មានរួមគ្នា កាលពីថ្ងៃពុធ ទី២១ ខែសីហា ឆ្នាំ២០១៣ ថា កុមារាម្នាក់ទៀត អាយុ ៦ឆ្នាំ នៅខេត្តកណ្តាល បានឆ្លងជំងឺផ្តាសាយបក្សី H5N1។ កុមារនោះ ត្រូវបានបញ្ជាក់ថា មានផ្ទុកមេរោគជំងឺផ្តាសាយបក្សី ដោយវិទ្យាស្ថានប៉ាស្ទ័រ។
សេចក្តីប្រកាសបង្ហាញថា កុមារា អាយុ ៦ឆ្នាំ នៅខេត្តកណ្តាល ដែលបានឆ្លងជំងឺផ្តាសាយបក្សី គឺជាករណីទី១៧ ក្នុងឆ្នាំ២០១៣។ កុមារារងគ្រោះ រស់នៅក្នុងឃុំព្រែកស្លែង ស្រុកកណ្តាលស្ទឹង ខេត្តកណ្តាល បានចាប់ផ្តើមឈឺ នៅថ្ងៃទី២១ ខែកក្កដា ដោយមានជំងឺគ្រុនក្តៅ ឈឺក្បាល ក្អួតចង្អោរ ឈឺចុកចាប់រាងកាយ។ កុមារានោះ បានប៉ះពាល់នឹងបសុបក្សី មាន់ និងទា ដែលឈឺ។
កាលពីថ្ងៃទី៩ និងថ្ងៃទី១០ ខែសីហា ឆ្នាំ២០១៣ វិទ្យាស្ថានប៉ាស្ទ័រ ក៏បានរកឃើញជំងឺផ្តាសាយបក្សី កើតលើកុមារីម្នាក់ អាយុ ៥ ឆ្នាំ មកពីស្រុងស្អាង ខេត្តកណ្តាល និងកុមារាម្នាក់ អាយុ ៩ឆ្នាំ មកពីខេត្តបាត់ដំបង។ តែកុមារា អាយុ ៩ ឆ្នាំ ដែលសម្រាកព្យាបាលជំងឺនៅមន្ទីរពេទ្យកុមារ នៅខេត្តសៀមរាប បានស្លាប់កាលពីយប់ថ្ងៃទី១៨ ខែសីហា ឆ្នាំ២០១៣។ រីឯកុមារី អាយុ ៥ ឆ្នាំ បានធូរស្បើយជាបណ្តើរៗហើយ។
គិតចាប់តាំងពីឆ្នាំ២០០៥ មកដល់ពេលនេះ នៅកម្ពុជា កើតមានជំងឺផ្តាសាយបក្សី H5N1 ចំនួន ៣៨ ករណី។ ក្នុងនោះ មានអ្នកស្លាប់យ៉ាងហោចណាស់ ២៨ នាក់។ បើគិតត្រឹមតែដើមឆ្នាំ២០១៣ មកដល់ថ្ងៃទី២២ ខែសីហានេះ ជំងឺផ្តាសាយបក្សី នៅកម្ពុជា កើតមាន ១៧ ករណី និងបានសម្លាប់មនុស្ស ១០ នាក់។ អ្នកជំងឺស្ទើរតែទាំងអស់ ជាកុមារ៕
Subscribe to:
Post Comments (Atom)
Facebook
No comments:
Post a Comment