ភ្នំពេញៈ អ្នកលក់កាតកោសរបស់ក្រុមហ៊ុនទូរស័ព្ទចល័តអឹមហ្វូនកំពុងតែព្រួយបារម្ភចំពោះការខាតបង់ខណៈក្រុមហ៊ុននេះបានផ្ទេរស៊ីមកាតរបស់ខ្លួនទៅក្នុងប្រព័ន្ធក្រុមហ៊ុនសែលកាត របស់ម៉ូប៊ីតែល។
អតិថិជនលក់រាយនិងលក់ដុំជាច្រើនសុទ្ធតែមានក្តីកង្វល់ចំពោះការខាតបង់ទឹកប្រាក់ដែលបានទិញកាតទូរស័ព្ទយកមកលក់ខណៈអតិថិជនរបស់អឹមហ្វូនទាំងអស់ត្រូវប្តូរទៅប្រើប្រព័ន្ធសែលកាតវិញ។
លោកស្រីសរ សុគន្ធា អ្នកលក់រាយកាតទូរស័ព្ទគ្រប់ប្រភេទជិត២ឆ្នាំនៅខាងជើងផ្សារបឹងកេងកងបានឲ្យដឹងថាអ្នកស្រីនៅសល់កាតកោសអឹមហ្វូនចំនួន៧០ដុល្លារដែលលក់មិនចេញ។
អ្នកស្រីបន្តថា៖ «ខ្ញុំគិតថាបើគេមិនមានដំណោះស្រាយឲ្យគឺវាអយុត្តិធម៌ណាស់។ខ្ញុំយល់ថាបើមានដំណោះ
ស្រាយដោះដូរកាតគឺល្អ។ខ្ញុំស្តាយលុយតែខ្ញុំមិនដឹងធ្វើម៉េច»។
ស្រាយដោះដូរកាតគឺល្អ។ខ្ញុំស្តាយលុយតែខ្ញុំមិនដឹងធ្វើម៉េច»។
អ្នកស្រីបានឲ្យដឹងថា អ្នកស្រីធ្លាប់បានទាក់ទងទៅក្រុមហ៊ុនអឹមហ្វូនដោយផ្ទាល់ដែរថ្មីៗនេះ ប៉ុន្តែក្រុមហ៊ុនមិនបានផ្តល់ដំណោះស្រាយថាត្រូវធ្វើយ៉ាងដូចម្តេចនោះទេ។ អ្នកស្រីបន្តថា ប្រាក់៧០ដុល្លារជាចំនួនច្រើនសម្រាប់រូបគាត់ជាអ្នកលក់រាយហើយថានេះវាជាអំពើអយុត្តិធម៌មួយដែលមិនគួរកើតឡើងសម្រាប់អតិថិជននោះទេ។
បច្ចុប្បន្នក្រុមហ៊ុនអឹមហ្វូនបានផ្ទេរអតិថិជនរបស់ខ្លួនទៅឲ្យក្រុមហ៊ុនម៉ូប៊ីតែលដោយសារតែក្រុមហ៊ុនកំពុងជួបបញ្ហាវិបត្តិហិរញ្ញវត្ថុនិងបណ្តឹងជាច្រើនទាក់ទងនឹងការជំពាក់បំណុល។
ម្ចាស់ហាងលក់ទូរស័ព្ទ យីហោ លីណា ស្ថិតតាមបណ្តោយមហាវិថីព្រះនរោត្តមក្នុងសង្កាត់ទន្លេបាសាក់ ដែលសុំមិនបញ្ចេញឈ្មោះ បាននិយាយថាអ្នកស្រីជាអ្នកលក់ដុំសម្រាប់ចែកចាយដល់អ្នកលក់រាយនៅប្លុកក្បែរៗនេះ។ អ្នកស្រីបន្តថាអ្នកស្រីបានទៅសួរក្រុមហ៊ុនផ្ទាល់តែគេឆ្លើយថា មិនទាន់មានដំណោះស្រាយ។
អ្នកស្រីបន្តថាអ្នកលក់រាយតែងតែមកសួរអំពីបញ្ហានេះ៖
« មួយថ្ងៃៗហត់ចង់ងាប់ហើយរឿងឆ្លើយប្រាប់គេ។យើងបារម្ភចំពោះការបាត់បង់ព្រោះគេប្រាប់ថាចាំដោះស្រាយតាមក្រោយ»។
បច្ចុប្បន្នអ្នកស្រីសល់កាតរបស់ក្រុមហ៊ុនអឹមហ្វូនជាង៣០០ដុល្លារ។ អ្នកស្រីបានស្នើឲ្យមន្ត្រីក្រសួងប្រៃសណីយ៍និងទូរគមនាគមន៍ចាត់ការចំពោះករណីនេះដើម្បីកុំឲ្យក្រុមហ៊ុនកេងចំណេញពីអ្នកប្រើប្រាស់ដោយអំពើអយុត្តិធម៌បែបនេះ។
លោក សូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានប្រាប់ភ្នំពេញ ប៉ុស្តិ៍កាលពីថ្ងៃចន្ទថាក្រុមហ៊ុនទាំងពីរនិងក្រសួងកំពុងរកវិធីដោះស្រាយបញ្ហា។លោកថ្លែងថា៖«យើងបានប្រជុំកាលពីប៉ុន្មានថ្ងៃមុននេះថាធ្វើយ៉ាងណាមិនឲ្យអតិថិជនខាតបង់ផលប្រយោជន៍ទេ។តុលាការសម្រេចជាការខាតបង់ប្រយោជន៍របស់ក្រុមហ៊ុនតែមិនប៉ះពាល់អតិថិជនទេ»។
ចាប់តាំងពីការប្រកាសផ្ទេរអតិថិជនអឹមហ្វូនទៅសែលកាត មកកាតកោសរបស់អឹមហ្វូនមិនត្រូវបានលក់ចេញទេ។
អ្នកស្រីគង់ វត្តី អាយុ ៤០អ្នកលក់កាតកោសតាមរយៈប្រតិបត្តិការរបស់ Wing ម្នាក់និយាយថាគ្មានអតិថិជនណាសួររកទិញកាតបញ្ចូលរបស់ក្រុមហ៊ុន អឹមហ្វូនទេក្នុងពេលនេះ។
អ្នកយកព័ត៌មានភ្នំពេញ ប៉ុស្តិ៍បានទៅដល់ការិយាល័យក្រុមហ៊ុនតាមការណាត់ជួបរបស់មន្ត្រីក្រុមហ៊ុនម្នាក់ដែលសុំមិនបញ្ចេញឈ្មោះតែទីបំផុតត្រូវមន្ត្រីក្រុមហ៊ុននេះបានប្រាប់ថា គេគ្មានព័ត៌មានអ្វីត្រូវផ្តល់ជូនទេ។បុគ្គលិករូបនោះនិយាយថា៖ «ក្រុមហ៊ុនគ្មានព័ត៌មានអ្វីប្រាប់ទៅខាងបងទេ។ក្រុមហ៊ុនកំពុងមានចំណាត់ការរបស់គេ។ ក្រុមហ៊ុនគេប្រាប់មកខ្ញុំអ៊ីចឹងឲ្យខ្ញុំប្រាប់បងអ៊ីចឹង»។
ដោយឡែកបុគ្គលិកបម្រើសេវាអតិថិជនរបស់ក្រុមហ៊ុន ម៉ូប៊ីតែល បានឲ្យដឹងថាម៉ូប៊ីតែល ទទួលស្គាល់តែទឹកលុយដែលមាននៅក្នុងស៊ីមកាតប៉ុណ្ណោះហើយទឹកប្រាក់ដែលមានគឺប្រើបានតែក្នុងប្រព័ន្ធតែប៉ុណ្ណោះ។
បច្ចុប្បន្នក្រុមហ៊ុនអឹមហ្វូនកំពុងជាប់បណ្តឹងពាក់ព័ន្ធនឹងបំណុលជាច្រើនលានដុល្លារ៕ ប្រភពមកពី ភ្នំពេញប៉ុស្តិ៍
Facebook
No comments:
Post a Comment