ប្រជាពលរដ្ឋ នៅតាមបណ្តាខេត្តជាប់ព្រំដែនជាមួយថៃ ដែលប្រកបមុខរបរ ជាកិសរធ្វើកសិក្មម ជាពិសេសគឺវិស័យនំចូលពោត ដែលនឹងទទួលបានអត្ថប្រយោជន៍ពីគោលនយោបាយថ្មីរបស់ថៃ លើការនាំចូលពោតសម្រាប់ផលិតចំណីសត្វ។
យោងតាមគេហទំព័របាងកកប៉ុស្តិ៍ បានរាយការណ៍កាលពីថ្ងៃទី២២ខែមករាថាគណៈរដ្ឋមន្ត្រីថៃបានអនុម័តឲ្យនាំចូលពោតគ្មានពន្ធគយចំនួន៤៥ម៉ឺនតោនពីប្រទេសកម្ពុជានិងឡាវក្នុងនោះថៃគ្រោងនាំចូលពីប្រទេសកម្ពុជា ២៥ម៉ឺនតោន។ មន្ត្រីកសិកម្មខេត្តបន្ទាយមានជ័យបានប្រាប់ភ្នំពេញ ប៉ុស្តិ៍កាលពីថ្ងៃព្រហស្បតិ៍ថាផលិតផលពោតកម្ពុជាអាចឡើងថ្លៃដោយសារតែគោលនយោបាយនេះ។ លោក ថោង ស៊ីណា ប្រធានមន្ទីរពាណិជ្ជកម្មខេត្តបន្ទាយមានជ័យបានឲ្យដឹងថា៖«វានឹងមានឥទ្ធិពលមកលើតម្លៃពោតនៅប្រទេសរបស់យើងប៉ុន្តែធំឬក៏តូចវាអាស្រ័យទៅលើបរិមាណទិន្នផល។ប្រសិនបើទីផ្សារត្រូវការច្រើនតម្លៃពោតនិងឡើងខ្ពស់»។ បើតាមកាសែតបាងកក ប៉ុស្តិ៍ ថៃ នឹងចាប់ផ្តើមនាំចូលពីកម្ពុជាចំនួន១០ម៉ឺនតោននៅខែសីហា និង១៥ម៉ឺនតោននៅចុងឆ្នាំនេះនិងដើមឆ្នាំ២០១៤។
រដ្ឋាភិបាលថៃជាទូទៅតែងតែលើកកម្ពស់គោលនយោបាយកសិកររបស់ខ្លួនក្នុងការរកទីផ្សារប៉ុន្តែកសិករខ្មែរជារឿយៗតែងតែចាំត្រងឥទ្ធិពលពីប្រទេសជិតខាងឬពឹងលើទីផ្សារក្រៅប្រទេស។ ថ្មីៗនេះតំណាងរាស្ត្របក្សប្រឆាំងបានស្នើឲ្យនាយករដ្ឋមន្ត្រីដកលោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្មចេញពីតំណែង ដោយហេតុផលថាអសមត្ថភាពក្នុងការរកទីផ្សារជូនកសិករ។ ទីផ្សារកសិកម្មនៅកម្ពុជាមិននឹងនរនិងមិនច្បាស់លាស់ហើយស្ថិតក្នុងកណ្តាប់ដៃឈ្មួញ។ របាយការណ៍ក្រសួងកសិកម្ម រុក្ខប្រមាញ់ និង នេសាទ ថា កសិករកម្ពុជាបានដាំដុះពោតនៅលើផ្ទៃដី១៨៤ ៨៧២ ហិកតានៅក្នុងឆ្នាំ២០១២ ហើយប្រមូលផលបាន៧៧០ ៨៦០តោន។ របាយការណ៍បញ្ជាក់ថាខេត្តដែលមានដាំពោតច្រើនមានខេត្តបាត់ដំបង ព្រះវិហារ កណ្តាល កំពង់ចាម ប៉ៃលិន បន្ទាយមានជ័យ និងពោធិ៍សាត់។ ចរន្តនៃការដាំពោតបានធ្លាក់ចុះខណៈទីផ្សារដំឡូងមីបានហក់ឡើងតែមួយឆាវនោះ។ លោក ថោង ស៊ីណា និយាយថា កសិករបានងាកទៅដាំដំឡូងមីកាន់តែច្រើនដោយសារវាងាយស្រួលដាំ ខណៈពោតជាប្រភេទដំណាំត្រូវការទុនច្រើន។លោកបន្តថា៖ «ពោតត្រូវចំណាយបីដងលើសដាំដំឡូង។ ប្រសិនខ្ញុំព្យាករទៅពេលនេះទិន្នផលពោតធ្លាក់ចុះដូចនេះតម្លៃនឹងកើនទៅក្នុងថ្ងៃអនាគត»។ លោក សុខ សាធីម អនុប្រធានមន្ទីរពាណិជ្ជកម្មខេត្តប៉ៃលិន បាននិយាយថាបច្ចុប្បន្នតម្លៃស្ថិតនៅចន្លោះ៨០០ទៅ៩០០រៀលក្នុងមួយគីឡូក្រាមដែលតម្លៃមិនមានការប្រែប្រួលនៅឡើយទេ។ ការដាំពោតរបស់កសិករនៅខេត្តប៉ៃលិនបានធ្លាក់មកនៅត្រឹម៣០ភាគរយនៃចំនួនសរុបខណៈកសិករដាំដំឡូងមីមានរហូតដល់៧០ភាគរយក្នុងឆ្នាំ២០១២។ រីឯឆ្នាំ២០១១កសិករដាំដុះពោតមាន៤០ភាគរយ។ កសិករ មាស លឿន ដែលប្រកបរបរដាំពោត និង ដំឡូងមីលើផ្ទៃដី៥០ហិកតានៅខេត្តប៉ៃលិននិយាយថាគោលនយោបាយថៃនេះមិនមានអ្វីថ្មីសម្រាប់កសិករកម្ពុជានៅតាមជាយដែនទេព្រោះពួកគេតែងតែបង្កបញ្ហាពេលកសិករខ្មែរប្រមូលផលដូចជាហាមឃាត់ក្នុងការនាំចូលទៅប្រទេសគេជាដើម។ លោកបានបន្តថា៖«គេតែងតែចេញគោលនយោបាយថ្មីប៉ុន្តែកសិករតែងតែប្រឈមការលំបាករហូត»៕ ប្រភពមកពី ភ្នំពេញប៉ុស្តិ៍
Facebook
No comments:
Post a Comment