ស្ថានទូតសហរដ្ឋអាមេរិកកំពុងតាមដានដោយយកចិត្តទុកដាក់ នូវការវិវត្តន៍នៃការបោះឆ្នោត ហើយតែងតែអំពាវនាវអោយមានការស៊ើបអង្កេតពេញលេញ និងប្រកបដោយតំលាភាពនូវភាពមិនប្រក្រតីនានា ដែលធ្វើអោយប្រជាជនកម្ពុជាអ្នកបោះឆ្នោតអាចជឿទុកចិត្ត បាន។ សំខាន់ដូចគ្នានេះដែរ យើងបន្តសុំអោយភាគីទាំងពីរធ្វើការពិភាក្សាគ្នាប្រកបដោយភាពវិជ្ជមាន និងក្នុងន័យស្ថាបនាដើម្បីរកផ្លូវដើរទៅមុខប្រកបដោយសន្តិវិធី និងបំរើឧត្តមប្រយោជន៍របស់ប្រជាជន កម្ពុជា។
តាមរយៈការពិភាក្សារបស់ខ្ញុំជាមួយតំណាងនៃគណបក្សនយោបាយទាំងពីរ មេដឹកនាំសង្គមស៊ីវិលនិងប្រជាជនសាមញ្ញ វាហាក់បង្ហាញអោយឃើញច្បាស់ថា គេមានការយល់ស្របគ្នាជារួមក្នុងចំណោម ប្រជាជនកម្ពុជា ដែលថាការបោះឆ្នោតនេះ គឺជាការអំពាវនាវយ៉ាងខ្លាំងអោយមានការកែទំរង់ដ៏មានន័យ ជាពិសេស ក្នុងដំណើរការនៃការបោះឆ្នោត ការពង្រីកសេដ្ឋកិច្ច និងការប្រឆាំងអំពើពុករលួយជាដើម។ មានមិត្តអ្នកអានម្នាក់ចោទជាសំណួរថា “តើប្រទេសកម្ពុជាអាចធ្វើការផ្លាស់ប្តូរបានយ៉ាងដូចម្តេច?”។ ថ្វីត្បិតតែមានអ្នកខ្លះប្រហែលចាត់ទុកការមិនចុះសំរុងគ្នារវាងគណបក្សទាំងពីរនៅពេលនេះថាជាបញ្ហា ប្រឈមក្តី តែខ្ញុំចាត់ទុកស្ថានភាពនេះថាជាឱកាសពិសេសមួយ សំរាប់ធ្វើការកែទំរង់ដ៏មានន័យ ដែលអាចបង្កើនល្បឿននៃការអភិវឌ្ឍន៍របស់ប្រទេសកម្ពុជា ហើយផ្តល់ជាប្រយោជន៍ដល់ប្រជាជនកម្ពុជាទាំងអស់។
ដូចអ្វីដែលបានបង្ហាញក្រោយការបោះឆ្នោតដែលមានភាពប្រទាញប្រទង់ ការផ្លាស់ប្តូរដ៏សំខាន់ ចំពោះដំណើរការបោះឆ្នោត គឺចាំបាច់ដើម្បីផ្តល់អោយគណបក្សទាំងអស់និងប្រជាពលរដ្ឋកម្ពុជា មាន ជំនឿចិត្តកាន់តែច្រើនទៅលើលទ្ធផលបោះឆ្នោតនាពេលអនាគត។ គណៈកម្មាធិការមួយដែលបង្កើតឡើង ដើម្បីស៊ើបអង្កេតនូវភាពមិនប្រក្រតីទាក់ទងនិងការបោះឆ្នោត អាចជួយដោះស្រាយនូវភាពខ្សោយនិង ភាពដែលងាយនិងទទួលរងគ្រោះនៅក្នុងដំណើរការ ដែលនេះនឹងធ្វើអោយការបោះឆ្នោតនៅកម្ពុជាក្នុងពេលអនាគតលែងមានបញ្ហាទាំងអស់នេះទៀត។
បន្ថែមលើនេះ ការអនុវត្តន៏នូវអនុសាសន៏របស់អ្នករាយ ការណ៏ពិសេសស្តីពីសិទ្ធិមនុស្សរបស់អង្គការសហប្រជាជាតិ ដូចជាការកែប្រែនូវបញ្ជីឈ្មោះអ្នកបោះឆ្នោត និងការធ្វើអោយសកម្មភាពរបស់គណៈកម្មាធិការជាតិរៀបចំការបោះឆ្នោតមានភាពអព្យាក្រិតនិងតំល្លា ភាពពេញលេញ នឹងបន្ថែមនូវតំលៃដ៏មានន័យដល់ស្មារតីនៃដំណើរការលទ្ធិប្រជាធិបតេយ្យ។
ការប្រកាសនាពេលថ្មីៗនេះរបស់សម្តេចនាយករដ្ឋមន្ត្រី ហ៊ុន សែន ដើម្បីតំឡើងប្រាក់ខែដល់មន្ត្រីរាជការជាច្រើន ជាពិសេសមន្ត្រីរាជការថ្នាក់ក្រោមដែលមានប្រាក់ខែទាប គឺជាជំហានវិជ្ជមានទីមួយ នៅក្នុងរបៀបវារៈកំណែទំរង់ដ៏មានន័យ។ ជាការពិត ការតំឡើងប្រាក់ខែដល់មន្ត្រីរាជការ គឺជាគំនិតមួយដែលមានការគាំទ្រយ៉ាងខ្លាំងគ្រប់គណបក្សទាំងអស់។ សំរាប់បុគ្គលិកទាំងអស់ ដើម្បីអោយគេផ្តោតការ យកចិត្តទុកដាក់ចំពោះការទទួលខុសត្រូវរបស់គេ គេត្រូវទទួលបាននូវប្រាក់បៀវត្សស្របតាមការងារដែល គេធ្វើ។ ការតំឡើងប្រាក់ខែនៅក្នុងរដ្ឋាភិបាលនេះ គឺជាភស្តុតាងបង្ហាញអោយឃើញថា ការផ្លាស់ប្តូរក្នុង ការឆ្លើយតបទៅនឹងសំលេងរបស់ប្រជាជន គឺអាចធ្វើទៅបាន។ សំរាប់កំណែទំរង់សេដ្ឋកិច្ចដ៏ខ្លាំងមួយ ខ្ញុំក៏ សូមលើកទឹកចិត្តដល់រាជារដ្ឋាភិបាលកម្ពុជា អោយផ្តោតការយកចិត្តទុកដាក់ដល់ការលើកំពស់គុណភាព វិស័យអប់រំ ដើម្បីផ្តល់អោយប្រជាពលរដ្ឋកម្ពុជាកាន់តែច្រើនថែមទៀត អាចទទួលបាននូវជំនាញការងារ កាន់តែខ្ពស់និងមានប្រាក់ខែកាន់ច្រើន។
ការធ្វើអោយភាពចំរើនដ៏មានន័យក្នុងការប្រយុទ្ធប្រឆាំងអំពើពុករលួយ នឹងលុបបំបាត់នូវឩបសគ្គ ដល់ការពង្រីកសេដ្ឋកិច្ចរបស់ប្រទេសកម្ពុជានិងអភិបាលកិច្ចល្អ។ ការបង្កើនប្រាក់បៀវត្សដល់មន្ត្រីរាជការ គឺជាវិធីសាស្ត្រមួយដែលអាចកាត់បន្ថយនូវការប៉ុនប៉ងរបស់គេក្នុងការប្រព្រឹត្តអំពើពុករលួយ ដើម្បីរកប្រាក់ បន្ថែមខាងក្រៅ។ ជាមួយគ្នានេះដែរ គណបក្សទាំងពីរអាចពង្រឹងនូវកិច្ខខិតខំប្រឹងប្រែងប្រឆាំងអំពើពុក រលួយដោយផ្តល់ការគាំទ្រដ៏ចាំបាច់ដល់អង្គភាពប្រឆាំងអំពើពុករលួយ ដើម្បីធានាថាប្រទេសកម្ពុជា ទទួលស្គាល់នូវសក្តានុពលដ៏ពេញលេញរបស់ខ្លួន។
នៅពេលដែលរដ្ឋសភាថ្មីកោះប្រជុំ សមាជិកសភានៃគណបក្សទាំងពីរ ត្រូវតែត្រៀមខ្លួនដើម្បីធ្វើ ការជាមួយគ្នាក្នុងន័យស្ថាបនានិងបន្តស្តាប់នូវឆន្ទៈរបស់ប្រជាពលរដ្ឋខ្មែរ។ គ្មាននណាមួយអាចសង្ឃឹមថា គណបក្សទាំងពីរនឹងយល់ព្រមទាំងស្រុងលើវិធីទាំងឡាយចំពោះការកែទំរង់ការបោះឆ្នោត ការលើក កំពស់ផ្នែកសេដ្ឋកិច្ច ការកាត់បន្ថយអំពើពុករលួយទេ ប៉ុន្តែការផ្លាស់ប្តូរយោបល់ដោយសេរី និងការពិភាក្សា ដោយស្វាហាប់ នឹងនាំមកនូវគោលនយោបាយល្អៗដើម្បីអនុវត្ត។ វាមានបុព្វហេតុពិតប្រាកដសំរាប់អោយ គេមានសុទិដ្ឋិនិយម ហើយខ្ញុំទន្ទឹងរង់ចាំដើម្បីគាំទ្រនូវរាជរដ្ឋាភិបាលថ្មីនិងប្រជាពលរដ្ឋកម្ពុជា នៅក្នុងកិច្ច ខិតខំប្រឹងប្រែងរបស់គេដើម្បីធ្វើអោយប្រទេសជាតិមានសន្តិសុខ ប្រជាធិបតេយ្យ និងវិបុលភាពកាន់ច្រើន ឡើង។
ដូចធម្មតាដែរ ខ្ញុំនៅតែរង់ចាំអានដោយរីករាយនូវសំណួរនិងមតិយោបល់ដែលលោកអ្នកផ្ញើមកខ្ញុំ ជាភាសាខ្មែរ ឬជាភាសាអង់គ្លេស តាមអ៊ីម៉េល AskAMBToddPP@state.gov ។ ប្រភពមកពី cen.com.kh
Facebook
No comments:
Post a Comment