ប្រភពពី postkhmer.com : ភ្នំពេញៈ យោងតាមសេចក្ដីប្រកាសព័ត៌មានកាលពីម្សិលមិញទទួលបានពីនិយតករ ទូរគមនាគមន៍កម្ពុជា (TRC) ប្រតិបត្តិករសេវាទូរស័ព្ទ ៩ របស់កម្ពុជាគ្រោងនឹងបង្កើតស្ថាប័នឯករាជ្យមួយដើម្បីពិភាក្សាអំពី បញ្ហានៅក្នុងឧស្សាហកម្មនេះ។
សេចក្ដីប្រកាសព័ត៌មានបានឲ្យដឹងថា ការបង្កើតសមាគមប្រតិបត្តិករទូរគមនាគមន៍កម្ពុជា ឬហៅកាត់ថា ATC ត្រូវបានយល់ព្រមជាគោលការណ៍នៅក្នុងកិច្ចប្រជុំមួយជាមួយ TRC កាលពីថ្ងៃ ទី១៣ ខែ ធ្នូ។
សមាគមថ្មីនេះត្រូវបានពណ៌នាថាជាការផ្ដល់ «សំឡេងតែមួយសម្រាប់ការពិភាក្សា និងដើម្បីកែលម្អការពិភាក្សាជាមួយ TRC។
លោក Thomas Hundt អគ្គនាយកក្រុមហ៊ុន Smart បានថ្លែងថា សម្រាប់ ATC គំនិតនេះត្រូវបានពិភាក្សាគ្នាអស់ពេលជាច្រើនឆ្នាំមកហើយ ប៉ុន្តែវាមិនដែលទទួលបានផ្លែផ្កាទេ។
ទោះជា ATC នឹងជំរុញឲ្យមានការពិភាក្សារវាងក្រុមហ៊ុនគូប្រជែងលើបញ្ហាជាច្រើន ដូចជាបទប្បញ្ញត្តិតម្លៃ ការផ្លាស់ប្តូរបច្ចេកវិទ្យា និងច្បាប់ទូរគមនាគមន៍កម្ពុជាក្តី ក៏លោក Hundt ថ្លែងថា វាមិនអាចដោះស្រាយរាល់ជម្លោះរបស់ឧស្សាហកម្មនេះទេ។
លោកមានប្រសាសន៍ថា៖ «មិនមានមធ្យោបាយណាអាចបញ្ចេញសំឡេងរួមត្រូវបានធានាដោយ ATC ទេ។ វាគឺមិនទំនងថា បញ្ហាភាគច្រើននឹងត្រូវបានយល់ព្រមនោះដែរ។ ជាចុងក្រោយយើងគឺជាគូប្រកួតប្រជែងទាំងអស់គ្នា»។ លោកបានសង្កត់ធ្ងន់ថា ស្ថាប័ននេះស្ថិតក្នុងដំណាក់កាលធ្វើផែនការនៅឡើយហើយមិនមានការ ផ្តួចផ្ដើមកិច្ចប្រជុំ ឬការកំណត់ពេលត្រូវបានកំណត់នោះទេ។
ក្នុងសេចក្ដីប្រកាសព័ត៌មានដូចគ្នានេះដែរ និយតករបានឲ្យដឹងថា ប្រតិបត្តិករទាំង ៩ បានយល់ព្រម «ធ្វើតាមនិងអនុវត្ត» តាមបទប្បញ្ញត្តិរបស់រដ្ឋាភិបាលទាក់ទងនឹងប្រកាសលេខ ២៣២ ក្នុងការអនុវត្តតាមតម្លៃទូរស័ព្ទថេរពោលគឺក្នុងប្រព័ន្ធ ៤,៥ សេនក្នុងមួយនាទីនិងក្រៅប្រព័ន្ធ ៥,៩៥ សេនក្នុងមួយនាទី។
កាលពីថ្ងៃ ទី២៨ ខែ វិច្ឆិកា រដ្ឋាភិបាលបានដាក់ឲ្យអនុវត្តជាថ្មីនូវអត្រាតម្លៃអប្បបរមា ពោលគឺជាងបីឆ្នាំបន្ទាប់ពីច្បាប់នេះត្រូវបានព្រាងក្នុងបំណង «ធានាពីការប្រកួតប្រជែងដោយយុត្តិធម៌»។ ការប្រកាសបានទទួលការតបតប្រឆាំងយ៉ាងខ្លាំងពីអ្នកប្រើប្រាស់ ទូរស័ព្ទ និងប្រតិបត្តិករទូរគមនាគមន៍នៅដើមខែនេះ។
កាលពីម្សិលមិញ ប្រតិបត្តិករទូរគមនាគមន៍ពីររួមទាំងក្រុមហ៊ុន Smart ត្រូវបានគេរកឃើញថាកំពុងផ្ដល់ការបន្ថែមទឹកប្រាក់ ១០០ ភាគរយនៅពេលបញ្ចូលប្រាក់គឺជា ផ្នែកមួយនៃការផ្សព្វផ្សាយនៅថ្ងៃឈប់សម្រាកដែលហាក់ដូចជាផ្ទុយ នឹងប្រកាសលេខ ២៣២។
ប៉ុន្តែលោក Hundt បាននិយាយថា ការបន្ថែមទឹកប្រាក់គឺស្របជាមួយនឹងច្បាប់របស់និយតករ ដែលអនុញ្ញាតឲ្យផ្សព្វផ្សាយក្នុងអំឡុងពេលថ្ងៃសម្រាក។
លោកបន្តថា៖ «ប្រកាសលេខ ២៣២ ចែងអំពីការផ្សព្វផ្សាយមួយចំនួនក្នុងឱកាសពិសេស។ ការផ្ដល់ជូនការបន្ថែមទឹកប្រាក់របស់យើងគឺស្របជាមួយនឹង បទប្បញ្ញត្តិនេះ»។
លោក ម៉ៅ ចរិយា អគ្គនាយក TRC បាននិយាយថា និយតករនឹងបើកកិច្ចប្រជុំផ្ទៃក្នុងមួយនៅថ្ងៃចន្ទ ដើម្បីត្រួតពិនិត្យពីស្ថានការណ៍របស់ឧស្សាហកម្មនេះ និងតម្លៃអប្បបរមា។
លោកបានថ្លែងបន្តថា ការពិភាក្សានឹងមានលទ្ធផលក្នុងការស្វែងរក «អ្វីដែលយើងនឹង ផ្លាស់ប្តូរក្នុងការធ្វើឲ្យត្រូវនឹងស្ថានការណ៍បច្ចុប្បន្នសម្រាប់ ការផ្ដល់ផលប្រយោជន៍ដល់អតិថិជន»៕ PB
Facebook
No comments:
Post a Comment